Dombyra meni ózine erekshe baýraı tústi - qyzylordalyq jas óren

<p>QYZYLORDA. KAZINFORM - Qyzylorda qalasyndaǵy Nazarbaev Zııatkerlik mektebiniń 8-synyp oqýshysy Adelına Fınansova qazaq tilinde jaqsy sóıleıdi. Qazir ol dombyrany jaqsy meńgerip, ánder men kúılerdi joǵary deńgeıde oryndaýdy jaqsy meńgerip keledi.</p>

Adelınanyń dombyra úırenýge degen qyzyǵýshylyǵy jetinshi synp oqyp júrgende bastalǵan eken. Mýzyka álemine jany jaqyn jas órendi dombyra birden-aq baýraı tústi. Alǵashqyda ustazy Jánibek ony qalaı ustaý qajettigin úıretken. Dombyrany úırenýge degen qyzyǵýshylyǵy artqan Adelına qazir qazaqtyń kóptegen ánderi men kúılerin oryndaýǵa mashyqtanyp aldy.

«Árbir mýzykalyq aspaptyń óz qupııasy, óz syry bar. Sol arqyly árbir halyqtyń jan dúnıesine boılaı túsetiniń anyq. Ózim mýzykaǵa jaqynmyn. Sondyqtan mýzykalyq aspaptardy úırenýge yqylasym erekshe. Qazaq halqynyń bolmys-bitimin aıshyqtaıtyn dombyra meni ózine erekshe baýraı tústi. Sol sebepti ony úırenýge sheshim qabyldadym. Bul maqsatta arnaıy dáris alýǵa sheshim qabyldadym. Oǵan ata-anam da qarsy bolǵan joq. Qoldaý bildirdi. Osylaısha dombyra úıirmesine bardym. Bul jóninen alǵashqy ustazym bolǵan Jánibek aǵaıǵa alǵys aıtamyn. Ol kisi ynta-yqylasymdy baıqap, birden dombyranyń qyr-syryn úırene bastady. Syrt kózge barlyǵy ońaı kórinetin shyǵar. Dese de men óz maqsatyma jetýge bar kúshimdi saldym. Búginde dombyrany úırenip, kóptegen shyǵarmalardy oryndaı alatyn deńgeıge jettim. Qazir qosymsha dombyra synybyna baryp júrmin. Meniń bolashaqta bıohımııa salasynyń mamany bolǵym keledi», - deıdi ol. 

Adelınanyń ákesi - orys, anasy - qazaq. Dostarynyń barlyǵy - jergilikti ult ókilderi. 

«Otbasynda ákem, anam, men jáne inim bar. Ákem memleket qyzmetker bolsa, anam jeke kompanııada esepshi qyzmetin atqarady. Maǵan qazaqsha úırený qıynǵa soǵa qoıǵan joq. Dostarymnyń barlyǵy derlik qazaqtar. Bala jasymnan aýyzeki tilde qazaqsha biletin edim. Zııatkerlik mektepke kelgenen keıin munda ony tereńdete oqı bastadym. Bul jóninen Ásıma apaıǵa rızashylyǵymdy bildiremin. Sonyń arqasynda tildi keńinen meńgere bastadym. Otbasynda qazaqtyń salt-dástúrin jaqsy bilemiz. Túrli merekede sol salt-dástúrdi qoldanyp, jergilikti ult ókilderimen birge toılaımyz. Qazaqstan halqy birligi merekesi kúni bárimiz úshin óte mańyzdy. Halyqtyń birligi qaı kezde de qajet. Elimiz bul jóninen álemdegi kóptegen memleketterge úlgi bola alady. Qazaqstanda kóptegen ulttar turady. Barlyǵy bir shańyraq astynda tatý-tátti ómir súrip keledi. Jarasymdy dástúr jalǵasyn taba beredi degen senimdemin. Basty kúshimiz - birlikte ekenin jaqsy bilemiz», - deıdi Adelına bizben áńgimesinde.