Dollardyń qymbattaýy: Ulttyq bank jańa talap engizedi

<p>ASTANA. KAZINFORM - Valıýta naryǵyndaǵy teńgerimdilikti arttyrý maqsatynda kvazımemlekettik sektor sýbektileriniń valıýtalyq túsimderiniń 50%-yn mindetti túrde satý talaby qaıta engiziledi. QR Úkimetiniń tıisti qaýlysy men Ulttyq banktiń buıryǵy jaqyn kúnderi qabyldanady. Bul týraly Ulttyq bank tóraǵasynyń orynbasary Álııa Moldabekova málim etti.</p>

«Sońǵy ýaqytta ishki jáne syrtqy faktorlardyń jıyntyǵy teńgeniń álsireýine alyp keldi. Syrtqy sektordaǵy jaǵdaı áli de kúrdeli bolyp otyr. Bul joǵary qubylmalylyq pen jahandyq ekonomıkalyq táýekelderdiń saqtalýymen baılanysty. AQSh dollary damyǵan jáne damýshy naryqtardyń valıýtalaryna qatysty nyǵaıýyn jalǵastyrdy. DXY ındeksi qyrkúıek aıynan beri 5,5%-ǵa artyp, 106,2 tarmaqqa deıin jetti. EM valıýtalarynyń ındeksi qyrkúıek aıynyń sońynan 4,1%-ǵa tómendedi», — dedi Álııa Moldabekova.

Onyń aıtýynsha munaı naryǵynda da pessımıstik ahýal baıqalyp otyr. Bul álemdik suranystyń baıaý qalpyna kelýi men OPEK+ tarapynan usynystyń ósýi boljanýyna baılanysty. Sonyń nátıjesinde munaı baǵasy barreline 71-72 AQSh dollary deńgeıine deıin tómendedi.

«Іshki valıýta naryǵynda ekonomıkalyq agentter tarapynan shetel valıýtasyna suranystyń artýy jáne valıýta naryǵynda, onyń ishinde kvazımemlekettik sektor tarapynan usynystyń shektelýi baıqalady. Shetel valıýtasyna suranystyń ósýi jalpy ekonomıkalyq belsendiliktiń, onyń ishinde syrtqy ekonomıkalyq belsendiliktiń artýyna baılanysty. Sondaı-aq, oǵan bıýdjet shyǵystarynyń artýy men kvazımemlekettik kompanııalardyń ınfraqurylymdyq jáne ınvestıtsııalyq jobalarǵa shyǵyndarynyń ulǵaıýy sep bolyp otyr. Osy faktordyń barlyǵy jıyntyǵynda ımporttyń ósýine, sáıkesinshe, shetel valıýtasyna suranystyń artýyna yqpal etedi. Valıýta naryǵyndaǵy suranys pen usynys teńgeriminiń buzylýy ınvestıtsııalyq ahýalǵa keri áserin tıgizip, ınvestıtsııalyq jobalardyń qymbattaýyna jáne jalpy ınflıatsııalyq qysymnyń artýyna alyp keledi. Osyǵan baılanysty valıýta naryǵyndaǵy teńgerimdilikti arttyrý maqsatynda kvazımemlekettik sektor sýbektileriniń valıýtalyq túsimderiniń 50%-yn mindetti túrde satý talaby qaıta engiziledi. Qazaqstan Respýblıkasy Úkimetiniń tıisti qaýlysy men Ulttyq banktiń buıryǵy ázirlenip, jaqyn kúnderi qabyldanady», — dep tolyqtyrdy UB ókili.

Onyń aıtýynsha bul talap 2023 jyldyń tamyzyna deıin qoldanysta bolǵan, alaıda makroekonomıkalyq jaǵdaıdyń ózgerýine baılanysty ýaqytsha toqtatylǵan edi. Sonymen birge, bul talap shoktardy báseńdetý úshin jedel qoldanýǵa bolatyn tıimdi qural bolyp tabylady.

Eske salsaq, kesheden beri dollar qor naryǵynda 500 teńgeden saýdalanyp jatyr.