Aqsha aıyrbastaıtyn oryndarda shetel valıýtasy erkin saýdalanýda — qaýymdastyq

<p>ASTANA. KAZINFORM — Keshe qazaq valıýtasynyń kúrt quldyraýynan keıin búgin qor bırjasyndaǵy kúndelikti saýdanyń qorytyndysy boıynsha teńgeniń quny dollarǵa qatysty azdap nyǵaıdy. Aqsha aıyrbastaý pýnktterindegi jaǵdaı turaqty: iri qalalarda dollar 520-523 teńge aralyǵynda satylýda. <a href="https://www.inform.kz/ru/defitsita-dollara-net-chto-proishodit-v-obmennikah-kazahstana-9f8ed4" target="_blank" rel="noopener">Kazinform tilshileri </a>kúni boıy teńge baǵamyn baqylap otyrdy.</p>

KASE-tiń juma kúngi kúndizgi saýda-sattyq qorytyndysy boıynsha dollardyń ortasha saralanǵan baǵamy keshegi kúrt serpilisten keıin 1,83 teńgege tómendep, 511,22 teńgeni qurady. Ulttyq banktiń 29 qarashadaǵy resmı baǵamy dollarǵa 513 teńgeni quraıdy.

Saǵat 12:00–de Almatydaǵy aqsha aıyrbastaý pýnkterinde dollardyń ortasha baǵamy 509,43-513,68 teńge, Astanada — 505,66-514,37 teńge, Shymkentte — 511,21-515,13 teńge boldy.

Foto: Aleksandr Pavskıı / Kazinform

Saǵat 14:00–de baǵam sál kóterildi: Almatyda dollar 515,42–519,58 teńgeni, Astanada — 511,98–520,00 teńgeni, Shymkentte — 514,92–519,58 teńgeni qurady.

Foto: Tatıana Korıakına/ Kazinform

Keshki saýdanyń qorytyndysy boıynsha saǵat 17:00–de baǵamdar belgilendi: Almatyda — 515,77-520,10 teńge, Astanada — 514,78-524,62 teńge, Shymkentte — 516,68-522,21 teńge.

Qazaqstandaǵy aqsha aıyrbastaý pýnktteri qaýymdastyǵynyń basshysy Arshyn Ǵalymbaev Kazinform agenttiginiń tilshisimen suhbatynda teńge baǵamynyń aýytqýy aıasynda aıyrbastaý pýnktterindegi jaǵdaı týraly aıtty.

«Keshe naryqta joǵary qubylmalylyq baıqaldy: saýdanyń basynda dollar úshin baǵam 503 teńge boldy, keıin 519 teńgege deıin kóterildi. Eń joǵary kórsetkish 519,7-ge jetti. Mundaı ózgeris, árıne, kópten beri bolmaǵan. Muny tarıhı maksımým dep ataýǵa bolady. Jaǵdaı teńgege qysym, álemdik naryqta dollardyń nyǵaıýy jáne reseılik valıýtanyń quldyraýyna baılanysty týyndady. Biraq, baǵam kóterilgenimen, aqsha aıyrbastaý pýnkterinde qarbalastyqty kórip turǵan joqpyz. Jaǵdaı turaqty», — dedi ol.

Sondaı-aq, ol aqsha aıyrbastaý pýnktterinde shetel valıýtasynyń qoljetimdiliginde eshqandaı másele joq ekenin basa aıtty.

«Kez kelgen kólemde qol jetimdi valıýtalar bar, bankter valıýtalardy satyp jatyr. Eshqandaı tapshylyq, asqan suranys nemese kóleńkeli baǵammen jasyryn satý jaǵdaılary baıqalǵan joq», — dep qosty Ǵalymbaev.

Aıta keteıik, keshe qazaqstandyq bırjada dollar kúrt nyǵaıdy: KASE-tegi ortasha baǵamy táýligine 12,58 teńgege qymbattap, 513 teńgege jetti. Kazinform tilshisi sóılesken sarapshylar naryqta mundaı serpilis buryn bolmaǵanyn jáne bul qubylysty anomaldy dep ataýǵa bolatynyn aıtty.

Búgin Qazaqstan Respýblıkasy Ulttyq bankiniń Aqsha-nesıe saıasaty komıteti bazalyq mólsherlemeni +/- 1 p.t dálizimen jyldyq 15,25%-ǵa deıin kóterý týraly sheshim qabyldady.