Dinı basqarma mas kúıinde ustalǵan Qostanaı ımamyn jumystan shyǵaryp, elden keshirim surady

<p>ASTANA. KAZINFORM — Qazaqstan musylmandarynyń dinı basqarmasy Qostanaı oblysy ımamynyń mas bolyp kólik aıdap ustalǵan qylyǵyna oraı keshirim surady. </p>

Eske sala keteıik, buǵan deıin Qostanaı oblysynyń ımamy Bahytbek Tájimbettiń 23 shildede Aqmola oblysynyń Býrabaı kentinde avtokóligin mas kúıinde júrgizip, jol erejesin buzǵanyn habarlaǵan bolatynbyz. 

Ony tártip saqshylary Býrabaıdaǵy «Regıon» túngi klýbynyń janynda «Haılandr» kóligimen ketip bara jatqanda qolǵa túsirgen. 

Imamǵa hattama toltyrylyp, 15 táýlikke qamaýǵa alyndy. 

Osy oqıǵaǵa baılanysty Qazaqstan musylmandary dinı basqarmasy málimdeme jasady. 

«Dinı basqarmanyń qyzmet júıesinde zań normalaryn jáne din qyzmetkeri etıkasyn óreskel buzatyn jeke tulǵalardyń dinı salada jumys isteýine moraldyq turǵydan quqyǵy joq. QMDB din qyzmetkerine laıyqsyz áreket jasaǵan Bahytbek Tájimbetti Qostanaı oblysynyń bas ımamy qyzmetinen bosatty. Qazaqstan musylmandary dinı basqarmasy bolǵan oqıǵany úlken ókinishpen qabyldap, elimizdegi musylman jamaǵatynan keshirim suraıdy. Alla Taǵala barshamyzdy jamandyq pen ókinishti isterge jeteleıtin nápsi qalaýynyń kesirinen saqtaǵaı» deıdi uıymnan.