Dmıtrıı Saýrmılıh: Tartyl Fest grand-fınalynda ulym menen júlde kútedi

KÓKShETAÝ. QazAqparat – Aqpannyń 18-de Astanada ótetin «Tartyl Fest» respýblıkalyq týrnıriniń grand-fınalyna qatysatyn 170 sportshynyń arasynda Dmıtrıı Saýrmılıh te bar. Ol - «Tartyl Fest» týrnıriniń Kókshetaýdaǵy jeńimpazy. QazAqparat tilshisine suhbat bergen sportshy osy jarysqa daıyndyǵy men aldaǵy jospary týraly tarqatyp aıtyp berdi.

– Dmıtrıı, áńgimemizdiń álqısasyn otbasyńyzdan bastasaq. Jalpy osy sportqa qalaı keldińiz jáne onymen kásibı deńgeıde aınalysyp júrgenińizge qansha ýaqyt boldy?

– Jasym 32-de, úılengenmin, Egor jáne Mılana esimdi eki balam bar. StreetWorkout-qa keletin bolsaq, bul elimizde endi damyp kele jatqan sport túri. Onymen aınalysyp júrgenime birer jyldyń júzi boldy.

Al negizi men StreetWorkout-qa uqsaq qysqy polıatlonnan Qazaqstan Respýblıkasynyń sport sheberimin. Qysqy polıatlonmen 12 jasymnan aınalysyp kelemin. Alǵashqy da aýdandyq jáne oblystyq deńgeıde, sońǵy kezderi respýblıkalyq jarystarda júldeger atanyp júrmin.

Shákirtterimdi de ózim sııaqty sportqa baýlyp júrmin.

– Shákirt tárbıesimen aınalysamyn dedińiz. Qazirgi tańda qaıda jumys isteısiz, osyǵan naqtyraq toqtala ketseńiz?

– Qazirgi kezde Petropavl qalasyndaǵy joǵary pedagogıkalyq kolledjde dene shynyqtyrý pániniń muǵalimi bolyp jumys isteımin. Qazaqstannyń ósip-órkendeýine, jastarymyzdyń salaýatty ómir saltyn ustanýyna, deni saý urpaq tábıeleý salasynda eńbek etip kelemin.

Osy kúni elimizde buqaralyq sportqa úlken mán berilip, kóńil aýdaryp, jan-jaqty qamqorlyq jasalyp otyrǵandyǵy qaýantady. Qazir sportpen aınalysamyn degen adamǵa arnaıy sport nemese fıtnes zalynyń bolýy mindetti emes.

Kez kelgen úıdiń aýlasynda kóshe trenajerleri bar. Eń birinshi adamda nıet bolsyn. Ózim de jattyǵýdy kóbine arnaıy zalda emes, syrtta, taza aýda ótkizgendi qalaımyn.

– Turǵylyqty jerińiz Petropavl bolsa, Kókshetaýda qalaı Tartyl Fest jarysyna qatysyp júrsiz?

– Iá, oryndy suraq. Munyń basty sebebi, Petropavlda StreetWorkout-pen aınalysyp júrgen jastardyń qarasy kóp. Kóp bolǵan soń, báseke de kúshti.

Tipti, ózimmen birge jattyǵý alańynda júrgen tanysym Rafaıl Qadyrov, kolledjdegi shákirtim Stanıslav Losevti osy Petropavldaǵy týrnırde júldeger atanyp gran-fınalǵa joldama aldy.

Sol sebepti, men Kókshetaýda baǵymdy synap kórdim. Otyz jastaǵylardan joǵary salmaqta 66 kelide 42 ret tartylyp, úzdik atandym. Degenmen, respýblıka boıynsha úzdikterdiń kórsetkishine sál jetpeı qaldy.

Jalpy, jattyǵý kezinde 48 ret erkin tartylyp júrmin. «Tartyl Fest» respýblıkalyq týrnıriniń grand-fınalynda barymdy salatyn bolamyn.

– Aldaǵy Tartyl Fest grand-fınalyna daıyndyǵyńyz qalaı?

– Daıyndyǵym joǵary deńgeıde ótip jatyr. Árıne, báseke kúshti, biraq soǵan qaramastan barymdy salatynym anyq. Osy festıvalden ulym menen júlde kútedi.

Eger jeńiske tuǵyrynan kórinip, aqshalaı syılyq alyp jatsam, ony otbasymnyń ıgiligine jáne saıahat jasaýǵa jumsaımyn.

- Dmıtrıı, ýaqyt bólip, suhbat bergenińizge rahmet. Aldaǵy Tartyl Fest respýblıkalyq týrnıriniń grand-fınalynda jeńimpaz bolyp, ulyńyzdyń armanynyń oryndalýyna tilektespiz.

Foto: keıipkerdiń jeke arhıvinen