Dmıtrıı Popko AQSh-taǵy jarystyń 1/8 fınalyna joldama aldy

<p>ASTANA. KAZINFORM &mdash; Qazaqstandyq, álemniń 234-raketkasy Dmıtrıı Popko Savanna (AQSh) chellendjer týrnıriniń ekinshi aınalymyna shyqty.&nbsp;</p>

Qazaqstandyq tennısshi alǵashqy kezdesýin dúnıejúzilik reıtıngide 462-orynda turǵan amerıkalyq, 20 jastaǵy Brýno Kýzýharamen ótkizdi.

D.Popko 1 saǵat 25 mınýtqa sozylǵan matchta 6:3, 6:4 esebimen basym tústi. Ol 3 eıspen birge 6 breık-poınttyń tórteýin múlt jibergen joq. Kýzýharanyń enshisinde 2 eıs, 2 breık (3 breık-poınt) bar.

Dmıtrıı Popko shırek fınalǵa shyǵý úshin reıtıngide 248-satydaǵy taǵy bir amerıkalyq Itan Kýınnmen synǵa túsedi.

Taǵy bir qazaqstandyq, reıtıngide 129-oryndaǵy Mıhaıl Kýkýshkın Madrıd masters týrnıriniń irikteý saıysynda álemniń 83-raketkasy, argentınalyq Federıko Korıadan jeńilis tapty – 2:6, 6:4, 2:6. Bul tartysty báseke eki saǵatqa jýyq ýaqytqa sozyldy.

Eske sala keteıik, budan buryn qazaqstandyq tennısshiniń Chehııadaǵy týrnırdi sátti bastaǵanyn jazǵan bolatynbyz.