Dızel tapshylyǵyna baılanysty Pavlodar munaı-hımııa zaýyty jóndeý jumysyna ózgerister engizdi

PAVLODAR. QazAqparat - Qazaqstannyń janar-jaǵarmaı naryǵynda dızel otynynyń tapshylyǵyna baılanysty Pavlodar munaı-hımııa zaýyty jóndeý jumysy josparyna ózgerister engizdi, dep habarlaıdy QazAqparat «Pavlodar munaı-hımııa zaýyty» JShS qoǵammen baılanys bólimine silteme jasap.

«PMHZ» JShS-nyń munaıdy bastapqy qaıta óńdeý bólimi dızel otynyn qosymsha óndirý maqsatynda jóndeý jumystaryna belgilengen ýaqyttan 10 kúnnen keıin shyǵady. Basqa jumystar óndiristen josparǵa saı alynady», - delingen habarlamada.

Zaýyt ákimshiliginiń habarlaýynsha, kásiporyndaǵy ýaqytsha jóndeý jumystary – kerek josparly shara.

Ol zaýyttyń tehnologııalyq quraldarynyń 2021-2022 jyldary jaqsy jumys isteýin qamtamasyz etýge múmkindik beredi.

Zaýyttyń jumysy toqtatylǵan kezde ǵana gaz qaýipti pisirý jumystaryn júrgizip, joǵary temperatýra men qysymda agressıvtik ortada jumys isteıtin tehnologııalyq jabdyqtardy aýystyrýǵa bolady.

Degenmen janar-jaǵarmaı men dızel otynynyń qoryn tıep-jóneltý zaýyt jumysynyń toqtaǵanyna qaramaı júrip otyrady.

Erterek, Pavlodar munaı-hımııa zaýytynyń 1 qazan kúni jospar boıynsha jóndeý jumystaryn júrgizý maqsatynda jumysyn ýaqytsha toqtatatyny habarlanǵan bolatyn.

Zaýyttyń barlyq tehnologııalyq qondyrǵylaryna jóndeý jumystaryn júrgizý josparlanǵan.

Zaýyt qazan aıynyń sońyna deıin jumysyn qaıta jandandyrady.

PMHZ jumysy toqtap turǵan kezde basqa qazaqstandyq munaı-hımııa zaýyttarynyń (Atyraý MHZ jáne Shymkent MHZ) jumysy kúsheımek.