Dızel otyny boıynsha eldegi jaǵdaı turaqtaldy – mınıstr Myrzaǵalıev

NUR-SULTAN. QazAqparat – Elimizde dızel otynynyń tapshylyǵy máselesi óz sheshimin taýyp, naryqta jaǵdaı turaqtaldy. Bul týraly QR Energetıka mınıstri Maǵzum Myrzaǵalıev málim etti, dep habarlaıdy QazAqparat tilshisi.

«Bıyl munaı ónimderiniń negizgi túrleri boıynsha 4,7 mln tonna benzın, 4,8 mln tonna dızel otyny, 2,4 mln tonna mazýt, bıtým 933 myń tonna jáne 600 myń tonna avıakerosın óndirildi. Ózderińiz biletindeı, bıyl tamyzdan qazanǵa deıin janar-jaǵarmaı naryǵynda dızel otynynyń tapshylyǵy baıqaldy. Іshki naryqty dızel otynymen qamtamasyz etý úshin mynadaı sharalar qabyldandy. Birinshiden, avtomobıl kóligimen munaı ónimderin áketýge tyıym salyndy, ekinshiden, Atyraý munaı óndeý zaýytynyń josparly jóndeý jumysy 2022 jylǵa aýystyryldy», - dedi M. Myrzaǵalıev Úkimet otyrysynda jasaǵan baıandamasynda.

Onyń aıtýynsha, bıyl elimizde munaı ónimderin óndirý 13,1 mln tonnaǵa jetti.

«Sondaı-aq, dızel tapshylyǵymen kúresý maqsatynda Pavlodar munaı óndeý zaýytynyń jóndeý jumysy bıylǵy jyldyń qyrkúıek aıynan qarashaǵa shegerildi. Odan bólek, Reseı Federatsııasynyń munaı óndeý zaýyttarynan 281 myń tonna dızel otyny ımporttaldy. Osy atalǵan jedel sharalar arqasynda eldegi dızel otyny naryǵynda jaǵdaı turaqtaldy», - deıdi ol.

Buǵan deıin mınıstr 2030 jylǵa qaraı munaı óndirý kólemi 104,2 mln tonnaǵa deıin jetetini týraly málimdedi.