Dızel qymbattaýyna munaı taratýshylardyń aıla-sharǵysy áser etken – Bas prokýratýra

ASTANA. QazAqparat – QR Bas prokýrory Berik Asylov Májilis depýtattarynyń saýalyna joldaǵan jaýabynda munaı berýshi usaq kompanııalardyń zańsyz aıla-sharǵysy týraly málimet berdi, dep habarlaıdy QazAqparat tilshisi.

«Baǵa ósimine munaı berýshilerdiń aıla-sharǵysynyń saldarynan onyń jasandy kóterilýi yqpal etken. Məselen, usaq berýshiler (jalpy naryqtyń 25%-yn alady) jaǵdaıdy paıdalanyp, kóterme baǵany ósirip, marjany jasandy túrde arttyrǵan. Olardyń qyzmeti monopolııaǵa qarsy zańnamamen rettelmeıdi. Óıtkeni taýar naryǵyndaǵy úlesi tómen jəne kóterme baǵa shekti baǵamen shektelmeıdi», - dep jazylǵan jaýapta.

Bas prokýrordyń málimeti boıynsha, jasandy áreketterdiń kesirinen bir lıtr dızeldiń baǵasy 500 teńgege deıin jetken.

«Qoldanystaǵy shekti bólshek saýda baǵasy 230-260 teńge bolǵan kezde keıbir berýshiler dızel otynyn kóterme baǵamen 260 teńgeden astam baǵaǵa, jeke jaǵdaılarda - 360-413 teńgege satqan. Jekelegen óńirlerde dızel otynynyń kóterme baǵasy 1 lıtr úshin 450-500 teńgege jetti. Bul shaǵyn bólshek janar-jaǵarmaı quıý stansalarynyń satylymnyń tıimsizdigine baılanysty otyn satýyn toqtata turýǵa jəne naqty otyn tapshylyǵyna alyp keldi», - dep jazady Berik Asylov.

Energetıka mınıstrliginiń Bas prokýratýraǵa usynǵan derekteri boıynsha tapshylyq órship turǵanda 633 janarmaı quıý stansasy baǵa teńsizdiginiń basylǵanyn kútip, qolda bar dızeldi satpaǵan.

«Búgingi kúni mundaı JQS sany 267-ge deıin qysqardy. Qazirgi ýaqytta Qarjy monıtorıngi agenttiginiń aýmaqtyq bólimsheleri tabıǵı monopolııalardy retteý óńirlik departamentterine janar-jaǵarmaıǵa shekti baǵany kóterýdiń anyqtalǵan faktileri boıynsha Ákimshilik quqyq buzý týraly kodekstiń 171-baby boıynsha kinəli adamdardy 2 əkimshilik jaýapqa tartý úshin 43 materıal jiberdi (búgingi kúni jalpy somasy 1,4 mln teńgege aıyppul salynyp, 17 adam jaýapqa tartyldy)», - delingen Bas prokýrordyń jaýabynda.

Foto: autospecialist.gr