Dızeldik otynnyń baǵasy kóterilmeıdi dep aıta almaımyz - U. Qarabalın

ASTANA. QazAqparat - Dızeldik otynnyń baǵasy kóterilmeıdi dep aıta almaımyz. Bul týraly búgin ótken brıfıngte QR Energetıka birinshi vıtse-mınıstri Uzaqbaı Qarabalın aıtty.

«Biz qazir naryqty baqylap, zerttep otyrmyz. Sondyqtan dızeldik otynnyń baǵasy kóterilmeıdi dep tolyq senimmen aıta almaımyz. Bizdi qorshaǵan memleketterdiń barlyǵynda baǵa bizdikinen joǵary. Al ashyq shekara jaǵdaıynda mundaı jaǵdaıǵa tótep berý qıyn», - dedi U. Qarabalın.

Birinshi vıtse-mınıstrdiń aıtýynsha, qazir egin naýqany júrip jatyr. Al elimizdegi dızeldik otyn shyǵaratyn zaýyttardyń bir aılyq óniminiń teń jartysy osy aýyl sharýashylyq qajettilikterine jumsalýda.

«Kóp mólsherde dızeldik otyn egin orýǵa ketip jatyr. Bul endi eki-úsh aıǵa sozylady ǵoı. Biz aı saıyn baǵasy tómendetilgen dızeldik otynnyń 170 myń tonnadaıyn aýyl sharýashylyǵyna berip jatyrmyz. Bul elimizdegi zaýyttar shyǵaratyn dızeldik otynnyń jartysyna jýyǵy. Biraq bul qystaı júrmeıtin nárse ǵoı. Sondyqtan bul kólemder qaıtadan naryqqa kiredi. Sol kezde dızeldik otynnan tapshylyq bolmaıdy dep oılaımyz», - dedi ol.