Dızeldi kórshi elderge zańsyz satatyndar jylyna 140 mln dollar paıda taýyp otyr

ASTANA. QazAqparat – QR Energetıka mınıstriniń mindetin atqarýshy Bolat Aqsholaqov Qazaqstannan dızel otynyn kórshi elderge shyǵaratyndar qansha paıda taýyp jatqanyn aıtty, dep habarlaıdy QazAqparat tilshisi.

«Qazaqstannan dızel otynyn túrli joldardy paıdalanyp, shetelge satýdan túsetin («kóleńkeli» eksporttan) paıda 50 paıyzdan 120 paıyzǵa deıin jetedi. Jalpy paıda jylyna shamamen 140 mln AQSh dollaryna deıin jetedi», - dedi B. Aqsholaqov Ortalyq kommýnıkatsııalar qyzmetindegi baspasóz máslıhatynda.

Energetıka mınıstrliginiń málimetinshe, júk kólikteri qosymsha tsısternalarmen jabdyqtalǵan kóptegen faktiler bar. Osylaısha, bir júk kóligi birden bir tonnadan tórt tonnaǵa deıin janarmaı quıa alady. Eger mundaı júk kóligi Qazaqstanda janarmaı quıyp, Ózbekstanǵa otyndy ótkizýge barsa, 1 tonnadan 700 dollar paıda tabýǵa bolady. Sonymen qatar Qyrǵyzstanǵa barsa, 250 dollar tabys alady.

Budan buryn habarlanǵandaı, Qazaqstanda benzın men dızel otynynyń baǵasy ósedi.

QR Energetıka mınıstriniń mindetin atqarýshy Bolat Aqsholaqov elimizde janarmaı baǵasynyń ósýine qandaı sebepter áser etip otyrǵanyn aıtty.