Dıvıdendtik saıasatty qaıta qaraý tásilderi ázirlenýde – Qarjy mınıstri

NUR-SULTAN. QazAqparat – Jekeshelendirýge jatatyn nysandar tizimine engizý úshin birqatar basty krıterıı bekitildi. Bul týraly Parlament palatalarynyń birlesken otyrysynda 2021 jylǵy respýblıkalyq bıýdjettiń atqarylýy týraly esepti qaraý kezinde Premer-Mınıstrdiń orynbasary–Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Qazirgi ýaqytta Jekeshelendirýdiń 2021-2025 jyldarǵa arnalǵan keshendi jospary boıynsha jumystar júrgizilip jatyr. Bul rette halyqtyń ómir súrýin qamtamasyz etetin jáne tabıǵı monopolııalar sýbektilerine jatatyn obektilerdi alyp tastaý qarastyrylady. Memleket basshysynyń tapsyrmasyn oryndaý maqsatynda jekeshelendirýge jatatyn obektiler tizimine engizý úshin birqatar basty krıterıı bekitildi», - dedi E. Jamaýbaev.

Onyń aıtýynsha, bul jerde negizgi maqsat – memleket úlesin azaıta otyryp, kásipkerlikti damytý jáne jekeshelendirýden qomaqty qarajat túsirý.

«Kvazımemlekettik sektor sýbektileriniń aktıvterin basqarýǵa kelsek, Úkimet qazirgi ýaqytta ony reformalaý, onyń ishinde dıvıdendtik saıasatty qaıta qaraý boıynsha tásilder ázirlep jatyr», - dedi Úkimet basshysynyń orynbasary.

Budan buryn habarlanǵandaı, Erulan Jamaýbaev depýtattardyń bıýdjetke qatysty usynymdary Úkimet jumysynda eskeriletinin aıtty.