Dıvıdend saıasaty qaıta qaralady – Erulan Jamaýbaev
«Qazirgi kezde Úkimet Dúnıejúzilik bankpen birlesip, kvazımemlekettik sektordy reformalaý boıynsha jumysty jalǵastyryp jatyr. Olar Ekonomıkalyq yntymaqtastyq jáne damý uıymynyń ozyq tájirıbeleri men standarttaryna sáıkes keledi. Nátıjesinde tıimdi, yqsham jáne ashyq kvazımemlekettik sektor qalyptasatyn bolady. Bul rette dıvıdendtik saıasat ta qaıta qaralady», – dedi E. Jamaýbaev.
Onyń aıtýynsha, kvazımemlekettik sektor sýbektileri qarajatynyń ıgerilýine monıtorıng júrgizý jáne olardyń eseptiligine qatysty másele jańa Bıýdjet kodeksinde qarastyrylatyn bolady.
Sonymen qatar mınıstr memlekettik boryshqa qatysty toqtaldy.
«Barlyq belgilengen boryshtyq kovenanttar saqtalyp otyr. Memlekettik qaryz jalpy ishki ónimge shaqqanda 25% tómen deńgeıde qalyptasqan. Qarjylyq shekteýlerdi qatań saqtaý saıasaty keleshekte de jalǵasatyn bolady. Bul másele Úkimettiń turaqty baqylaýynda. Biz qabyldanǵan mindettemelerdiń ashyqtyǵy men aıqyndyǵyn arttyrý boıynsha Joǵary aýdıtorlyq palatanyń usynymdaryn qoldaımyz. Olar jumys barysynda eskeriledi», - dedi Jamaýbaev.
Budan buryn habarlanǵandaı, Senattyń jalpy otyrysynda Joǵary aýdıtorlyq palatanyń tóraǵasy Natalıa Godýnova bıýdjettik ınvestıtsııalyq jobalardy iske asyrýǵa qatysty ortalyq memlekettik organdar men óńirlerdegi basshylardyń jaýapkershiligin engizý qajet ekenin aıtty.