Dıssertatsııalyq keńes quramy halyqaralyq tájirıbeni eskere otyryp jasaqtalady – Ashat Aımaǵambetov

NUR-SULTAN. QazAqparat - Dıssertatsııalyq keńestiń quramy halyqaralyq tájirıbeni eskere otyryp jasaqtalady. Bul jaıynda QR Bilim jáne ǵylym mınıstri Ashat Aımaǵambetov Facebook paraqshasynda jazdy, dep habarlaıdy QazAqparat tilshisi.

«Dıssertatsııalyq keńesterdiń quramy halyqaralyq tájirıbeni eskere otyryp jasaqtalady. Doktoranttyń zertteý taqyryptary áralýan bolǵandyqtan, dıssertatsııalyq keńes músheleriniń jartysy ýaqytsha taǵaıyndalatyn bolady. Endi keńes músheleri, qorǵaý qorytyndysy boıynsha dıssertatsııalyq keńes PhD dárejesin berý (1), PhD dárejesin bermeý (2), dıssertatsııany qaıta qorǵaýǵa jiberý (3) nemese doktorant jumysyn pysyqtaýǵa jiberý (4) syndy sheshim qabyldaı alady», - dedi ol.

Mınıstrdiń atap ótýinshe, buǵan deıin keńes músheleri tek eki sheshimniń bireýin qabyldaıtyn.

«Buǵan qosa, endi daýys berýge resmı retsenzentter de qatysatyn bolady». – dedi Ashat Aımaǵambetov.