Dırektormen qosa mekteptiń basqa qyzmetkerleriniń aýysýyna tosqaýyl qoıý kerek – Aımaǵambetov

NUR-SULTAN. QazAqparat – Mektep dırektorlaryn rotatsııalaǵanda basqa da qyzmetkerlerdiń birge aýysýyna tosqaýyl qoıý kerek. Bul týraly Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Rotatsııa ótkizgen kezde dırektormen qosa orynbasarlarynyń, esepshisiniń, basqa qyzmetkerlerdiń birge aýysýyna tosqaýyl qoıý kerek. Bul jaıynda aıttyq. Baqylaý departamentteri tıisti qadaǵalaýǵa alsyn. Bul rotatsııany bárin bir mektepten ekinshi mektepke kóship barýy úshin istep jatqan joqpyz. Osy máselege baqylaý júrgizý kerek. Jalpy, zań aıasynda barlyq jumys iske asýy tıis. Keıbir óńirde «myna mektepke barǵym keledi, mynaǵan barǵym kelmeıdi» deıtinderdi estip jatyrmyn. Muny toqtatý kerek. Eger «rotatsııany túsinbeımiz, qabyldamaımyz» dese, ondaı kisilermen eńbekshartyn tipti toqtatý qajet», - dedi mınıstr vedomstvonyń apparat jınalysynda.

Ashat Aımaǵambetov rotatsııa óte mańyzdy tetik ekendigin basa aıtty.

«Biraq, eki máselege nazar aýdarý qajet. Birinshiden, rotatsııa júrgizgen kezde orynbasarlaryn, esepshilerin ózimen birge alyp júrmeý, ekinshiden, obektıvti kózqaraspen, zańnamaǵa saı aýystyrý qajet. Bul jerde ártúrli táýekelderge jol berilmeýi tıis. Zań buzýshylyqtar bolsa, der kezinde sheshim qabyldaýymyz kerek», - dedi ol.

Buǵan deıin habarlaǵanymyzdaı, osy jyldyń 1 tamyzyna deıin 317 balabaqsha meńgerýshisi men 383 mektep dırektory aýysady.