«Dıplommen - aýylǵa» barǵan qaraǵandylyq jastarǵa úı berildi

QARAǴANDY. QazAqparat - Qaraǵandy oblysynyń Aqtoǵaı aýylynda «Dıplommen - aýylǵa» jobasy boıynsha aýdanǵa kelgen jas medıtsına mamandary turǵyn úımen qamtamasyz etildi. Olar aýrýhananyń janynda ornalasqan jaıly úıden páter aldy, dep habarlaıdy QazAqparat tilshisi.

Úsh páterli úıde kúrdeli jóndeý jumystary júrgizilgen. Shatyr, terezeler, edender jáne esikter aýystyryldy. Turǵyn úı ortalyqtandyrylǵan jylý jáne sý júıesine qosylǵan.

Páterler jaıly turýǵa arnalǵan barlyq qajettiliktermen jabdyqtalǵan.

«Qaraǵandy oblysy Densaýlyq saqtaý basqarmasynyń qoldaýymen jas mamandarǵa arnalǵan úsh páterli úıge kúrdeli jóndeý júrgizildi. Ol aýrýhana aýmaǵynda ornalasqan, sondyqtan jumys isteýge óte yńǵaıly. Qaıta jóndeý júrgizýdiń arqasynda ár páterlerdiń aýmaǵy ulǵaıtyldy», - dep atap ótti Aqtoǵaı aýdany ortalyq aýdandyq aýrýhanasynyń dırektory Sáttar Ábdiǵulov.