«Dıplommen aýylǵa» baǵdarlamasyna memqyzmetshiler engizilýi tıis - depýtat

NUR-SULTAN. QazAqparat - «Dıplommen aýylǵa» baǵdarlamasyna memlekettik qyzmetshiler de engizilýi tıis. Bul týraly Parlament Májilisindegi Úkimet saǵatynda depýtat Nurtaı Sabılıanov málim etti, dep habarlaıdy QzaAqparat tilshisi.

«Bıýdjetti sapaly josparlaýdy jáne kiristerdi ulǵaıtýdy qarastyrý máselelerine toqtalǵan mınıstr, «Jergilikti ózin-ózi basqarýdy jergilikti qoǵamdastyq músheleri tikeleı júzege asyrady. Jáne jergilikti qoǵamdastyq jınalysynda bıýdjettiń jáne onyń atqarylýy týraly eseptiń jobalary kelisiledi. Alaıda, keıbir ákimderdiń apparaty men máslıhattar bıýdjet jobasyn jergilikti turǵyndardy tartpaı-aq qaraıdy. Al halyq bıýdjettiń qalaı qalyptasatynyn jáne qandaı jergilikti máselelerdi sheshýge bıýdjet qarajaty jumsalatynyn bilýi tıis. Máselen, jergilikti ózin-ózi basqarý organdarynyń qarjylaı derbestigin arttyrý úshin bıýdjettiń IV deńgeıine kezeń-kezeńimen salyq pen tólemderdiń 7 túri berildi, al shyǵystar 19 baǵyt boıynsha júzege asyrylady», - dedi depýtat.

Onyń sózine qaraǵanda, sondyqtan ákimdikter bıýdjet jobasyn jáne jergilikti mańyzy bar máselelerdi qaraý kezinde jergilikti qoǵamdastyqtardy tarta otyryp, bıýdjetti sapaly josparlaý qajet. Jergilikti ózin-ózi basqarýdyń óz kiristerin ulǵaıtý úshin kásipkerlik sýbektilerine jaǵdaı jasap, jeńildetilgen kredıt jáne sýbsıdııalar berý arqyly memlekettik qoldaý kórsetý kerek.

«Budan basqa, IV deńgeıdegi derbes bıýdjetti engizý aýyldyq okrýgter ákimderi apparattaryn kadrlyq qamtamasyz etý máselesin sheshýdi talap etedi. Tipti keıbir aýyldyq okrýgter ákimderi apparattaryndaǵy zańgerler men býhgalterler shtattaǵy qyzmetkerler emes, shartpen jumys jasaýda. Mundaı jaǵdaı halyq sanyna baılanysty aýyldyq okrýgter ákimderi apparattarynyń shtat sanynyń belgilengen lımıtine baılanysty qalyptasyp otyr. Osyǵan oraı ortalyq memlekettik organdar men ákimdikter kadrlarmen, ásirese bilikti býhgalterlermen jáne zańgerlermen qamtamasyz etý máselesin sheshý úshin sharalar qabyldap, aýyldyq okrýgter ákimderi apparattarynyń shtat sanynyń lımıtin qaıta qaraý máselesin qarastyrýy qajet. Sonymen birge, «Dıplommen aýylǵa» baǵdarlamasyna memlekettik qyzmetkerler de engizilýi tıis. Ony biz tolyq qoldaımyz», - dedi Nurtaı Sabılıanov.

Budan buryn habarlanǵandaı, 2018 jylǵy 1 qańtardan bastap bıýdjettiń IV deńgeıi halyq sany 2 myńnan asatyn 1055 aýyldyq okrýgte engizildi.

Bul qazirgi barlyq aýyldyq okrýgterdiń 44 paıyzyn quraıdy. 2020 jyldan bastap qalǵan 1 338 aýyldyq okrýgte engiziletin bolady.

QR Ulttyq ekonomıka mınıstri Rýslan Dálenov bıýdjettiń IV deńgeıi engizilgen 1055 aýyldyq okrýgte qaı salanyń mamandary tapshy ekenin aıtty.