«Dıplommen aýylǵa» baǵdarlamasy boıynsha para alǵan maman sottaldy

NUR-SULTAN. QazAqparat – Túrkistan oblysynda Saryaǵash aýdanynyń qarjy bóliminiń bas mamany «Dıplommen aýylǵa» memlekettik baǵdarlamasy boıynsha turǵyn úı satyp alýǵa aqsha qarajatyn bólý týraly oń qorytyndy shyǵarǵany úshin jergilikti turǵynnan 350 myń teńge kóleminde para alǵan. Bul týraly onlaın brıfıngte Sybaılas jemqorlyqqa qarsy is-qımyl agenttiginiń Strategııa jáne jedel basqarý departamentiniń basshysy Nurlan Jaqsymbetov aıtty, dep habarlaıdy QazAqparat tilshisi.

«Túrkistan oblysynda Saryaǵash aýdanynyń qarjy bóliminiń bas mamany Qaramanov sottaldy. Ol «Dıplommen aýylǵa» memlekettik baǵdarlamasy boıynsha turǵyn úı satyp alýǵa aqsha qarajatyn bólý týraly oń qorytyndy shyǵarǵany úshin jergilikti turǵynnan 350 myń teńge kóleminde para aldy», - deıdi Sybaılas jemqorlyqqa qarsy qyzmettiń Strategııa jáne jedel basqarý departamentiniń basshysy Nurlan Jaqsymbetov.

Sondaı-aq, Almaty qalasynda para alǵany úshin 5 polıtsııa qyzmetkeri áshkerelengen.

«Zańsyz syıaqylardy negizinen olar ákimshilik jaýapkershilikke tartylmaǵany, karantındik beket arqyly kedergisiz ótkeni úshin alǵan», - deıdi ol.