Dıplommen aýylǵa attanǵandar nesıelerin endi Otbasy bank arqyly óteıdi

ASTANA. QazAqparat – «Dıplommen aýylǵa» jobasynyń qatysýshylary 1 mamyrǵa deıin banktiń klıenti bolyp úlgerýi qajet. Áıtpese, zaemdy ýaqytynda óteý múmkin bolmaıdy jáne nesıe boıynsha tólemdi keshiktirý qaýpi týyndaıdy, dep habarlaıdy QazAqparat uıymnyń baspasóz qyzmetine silteme jasap.

Elimizde «Dıplommen aýylǵa» jobasy óz jumysyn bastaǵaly beri 38 myń qazaqstandyq bıýdjettik nesıe alǵan eken. Biz bul klıenttik bazany baǵdarlamanyń burynǵy operatorynan aldyq. Zań boıynsha, osy nesıelerge qyzmet kórsetýdi jalǵastyrý úshin qaryz alýshylar «Otbasy bankinen» shot ashýlary qajet. Klıentterdi habardar etpeı, olardyń kelisiminsiz biz ony óz betimizshe ashýǵa quqyǵymyz joq. Sondyqtan, «Dıplommen aýylǵa» jobasynyń barlyq qatysýshylaryn 2023 jyldyń 1 mamyryna deıin jedeldetip, aǵymdaǵy shot ashyp, bank klıenti atanyp úlgerýlerin suraımyz. Sonda kez kelgen ekinshi deńgeıli bankten klıent osy aǵymdaǵy shotty tolyqtyryp, sol arqyly nesıesin óteı alady

, - dep túsindirdi «Otbasy bank» AQ Basqarma tóraǵasynyń orynbasary Nurlan Aqshanov.

2023 jyldyń 1 sáýirinen bastap Ulttyq ekonomıka mınıstrliginiń sheshimimen Otbasy bank «Dıplommen aýylǵa» jobasynyń senimdi agenti bolyp taǵaıyndaldy. Bul jobada turǵyn úı satyp alýǵa nemese salýǵa nesıe berý jáne kóterme járdemaqy tóleý qarastyrylǵan. Baǵdarlamaǵa aýyldyq jerlerge endi ǵana kelgen jáne onda birqatar kásip boıynsha jumys isteıtin kez kelgen jastaǵy qazaqstandyqtar qatysa alady. Olar: densaýlyq saqtaý, bilim berý, áleýmettik qamsyzdandyrý, mádenıet, sport, agroónerkásiptik keshen mamandary, aýyldyq okrýgter ákimderi apparattarynyń memlekettik qyzmetshileri (ákimder men ákimderdiń orynbasarlaryn qospaǵanda).

Aýdandyq ákimdikter men oblystyq mańyzy bar qalalardyń ákimdikteri jyl saıyn óz eldi mekeninde atalǵan mamandyqtar boıynsha talap etiletin qyzmetkerlerdiń tizbesin qalyptastyrady. Dál osy tizim aıasynda jeńildetilgen kredıtter beriledi.

Qaryzdyń eń joǵary somasy 1 500 AEK-ke deıin, kredıt boıynsha mólsherleme 0,01%-ǵa teń (JTSM – jyldyq 0,01%-dan bastalady). Qaryz maman jumys isteıtin eldi mekende turǵyn úı satyp alýǵa nemese salýǵa beriledi. Kredıttiń eń kóp merzimi – 15 jyl. Negizgi talap – jobaǵa qatysýshy aýyldyq jerde mamandyǵy boıynsha 3 jyl jumys isteýi kerek.

Járdemaqy men bıýdjettik kredıt alýǵa ótinishti bir mezgilde berýge bolady.

Azamattardyń ýaqytyn únemdeý jáne olarǵa osy memlekettik qoldaýdy alý protsesin jedeldetý úshin «Dıplommen aýylǵa» jobasy tsıfrlyq formatqa aýystyryldy. Qazaqstandyqtardan jańa ótinimder otbasybank.kz jyljymaıtyn múlik portalynda onlaın rejımde qabyldanady.

«Dıplommen aýylǵa» jobasy boıynsha ótinimderdi qabyldaýdyń bastalatyn kúnin bank qosymsha habarlaıdy. Al, bank klıenti bolýdyń birneshe joly bar:

- Otbasy bank mobıldi qosymshasyn júktep alyp, ony aǵymdaǵy shot pen depozıt ashý úshin paıdalaný;

- uıaly telefonnan 300 nómirine tegin qońyraý shalý;

- jaqyn jerdegi bank bólimshesine nemese keńes berý ortalyǵyna habarlasý.

Bank klıenti atanǵan qazaqstandyqtarǵa nesıe sharttary boıynsha esh ózgeris engizilmeıdi, olar zaemdaryn tóleýdi jalǵastyra beredi.