Dıplommen aýylǵa: Almaty oblysynda 168 jas dáriger aýylǵa attandy

ALMATY OBLYSY. QazAqparat - Bıyl Almaty oblysyndaǵy medıtsınalyq mekemege jumysqa ornalasqan 296 jas dárigerdiń 168-i aýylǵa jumysqa ornalasty. Olarǵa «Dıplommen aýylǵa» baǵdarlamasy boıynsha túrli jeńildikter qarastyrylǵan.

Almaty oblystyq Densaýlyq saqtaý basqarmasynyń basshysy Baýyrjan Ysqaqtyń aıtýynsha, jalpy oblysqa kelgen jas mamandarǵa bir rettik kótermeaqydan bólek úımen qamtý máselesi de qarastyrylǵan. Jergilikti medıtsınalyq mekeme dárigerlerdi jaldamaly pátermen qamtamasyz etip otyr. Sonymen qatar aýyldyq jerge jumysqa ornalasqan mamanǵa aılyq jalaqysyna 25 paıyz mólsherinde ústeme jalaqy tólenedi.

2009-2018 jyldar aralyǵynda Almaty oblysyna 2162 dáriger kelgen. Olarǵa «Dıplommen aýylǵa» baǵdarlamasy arqyly túrli jeńildikter jasaldy. Baspanamen qamtylyp, páter alýǵa jeńildetilgen nesıe, sondaı-aq kótermeaqy berildi.

Sonymen qatar Jetisý óńirine jumysqa ornalasqan mamandarǵa «Senim» Densaýlyq saqtaý júıesi jumyskerleriniń salalyq kásiptik odaǵy respýblıkalyq qoǵamdyq birlestiginiń Almaty oblystyq fılıaly qoldaý kórsetip, Taldyqorǵan qalasyndaǵy Kópsalaly oblystyq balalar aýrýhanasynyń balalar dárigeri Artem Reshetov pen Taldyqorǵan qalalyq emhananyń dárigeri Darmenbekova Janarǵa 1600000 teńgeniń turǵyn úı sertıfıkatyn tabystady. Sondaı-aq birneshe jas dárigerge 500 000 teńgeniń sertıfıkatyn berdi.