Dıplomdyq jumystardy jazatyn kóleńkeli naryq bar – Ashat Aımaǵambetov

NUR-SULTAN. QazAqparat - Bilim jáne ǵylym mınıstri Ashat Aımaǵambetov dıplomdyq jobalarǵa qoıylatyn talaptarǵa qatysty zańǵa ózgeris engizý máselesi qaralyp jatqanyn málim etti, dep habarlaıdy QazAqparat tilshisi.

«Dıplomdyq jumystardyń jyl saıyn qaıtalanatyny eshkimge jasyryn emes. Bizde dıplomdyq jumystar men jobalardy ázirleıtin kóleńkeli naryq bar. Olardyń bári birdeı. Atalǵan máseleni sheshý jáne aldyn alý maqsatynda biz zańǵa ózgerister engizý bastamasyn kóterip otyrmyz», - dedi Ashat Aımaǵambetov vedomstvoda ótken apparattyq jınalysta.

Osylaısha Bilim jáne ǵylym mınıstrligi tapsyrys boıynsha dıplom jazatyndarmen kúrespek.

Buǵan deıin mınıstr bıyl JOO-ǵa qujattar biryńǵaı tsıfrlyq platforma arqyly qabyldanatynyn jetkizdi.

Aıta ketsek, aldaǵy oqý jylynan bastap stýdentterdiń shákirtaqysy 20 paıyzǵa artady.

Sondaı-aq, mınıstrliktiń apparattyq jınalysynda JOO túlekterin eńbekpen qamtý jónindegi komıssııanyń jumysy synaldy.

Odan bólek, bıyl memlekettik granttardyń 60 paıyzy tehnıkalyq mamandyqtarǵa bólinetini aıtyldy.