Dıplomattar «Qorǵas-Shyǵys qaqpasy» AEA-nyń eýrazııalyq qurlyqtaǵy zor bolashaǵyn atap ótti
Olar Qurǵaq port, logıstıkalyq jáne ındýstrııalyq aımaq bolashaǵy, Altynkól stansasynyń qyzmeti, qazaqstandyq-qytaılyq «Qorǵas» halyqaralyq shekaralyq seriktestik ortalyǵy (HShSO) damý jobalarymen tanystyryldy, dep habarlaıdy «QTJ» UK» AQ baspasóz qyzmetinen. Reseıdiń Qazaqstandaǵy elshisi Mıhaıl Bocharnıkov «Qorǵas» AEA-da byltyr qurylysqa daıyndyq jumystary bastalǵan kezde bolǵan eken. Ekinshi ret bolǵan kezinde qaıran qalǵandyǵyn jasyrmady. - Bir jyl ishinde ǵana kóp nárse jasalyp qalypty. Men qazir iri temir jol jelisin kórip qýanyp turmyn. Jobany júzege asyrýdyń mańyzy óte zor. Bul Batys Qytaıdan shyǵatyn taýar aǵynyn Qytaı arqyly Eýropaǵa Qazaqstan jáne Reseı aýmaǵymen jetkizýdi júzege asyratyn úlken joba, - deıdi dıplomat. M.Bocharnıkovtyń aıtýynsha, Qazaqstan, Reseı, Belarýs elderi temir jol ákimshilikteriniń Birlesken kóliktik logıstıkalyq kompanııasynyń (BKLK) mańyzy zor. BKLK kompanııasymen osy joba boıynsha jumys bastaldy. «Qorǵas» jobasy barlyq maqsattarda keshendi túrde júzege asyrylýda. Qurǵaq portta Qytaıdyń tar tabandy temir jolymen kelgen konteınerler Qazaqstannyń 1520 mm keń tabandy jolyna almastyrylady. Bul keń tabandy temir jol EEO aıasyndaǵy elderdiń jalpy jolynyń mólsheri sáıkes keledi. Elshiniń paıymdaýynsha, mundaı tusakeser rásiminiń mańyzy óte joǵary. Óıtkeni asa aýqymdy joba boıynsha, qurylystyń basynda bolyp tyńdaýdyń áseri erekshe. Japonııanyń Qazaqstandaǵy elshisi Masaesı Kamohara AEA pen onyń ınfraqurylymynyń jobasyn joǵary baǵalady. - Men munda birinshi ret bolyp otyrmyn. Maǵan munda kórgenderimniń bári óte unady. Osynda arnaıy ekonomıkalyq aımaq ashý men jańa logıstıkalyq hab jasaý bul óte jaqsy bastama. Jańa Jibek joly arqyly Eýropaǵa baǵyttalǵan taýarlardy jetkizý merzimi edáýir qysqarady, - deıdi japon elshisi. Onyń aıtýynsha, Qorǵas aımaǵynda japondyq bıznes ókilderi qazirdiń ózinde qatysýda. Olardyń ishinde jobaǵa Japonııanyń «SENKOCo., Ltd.» kóliktik logıstıkalyq kompanııasy qatysyp jatsa, Toyota-Tsusho kompanııasy jáne basqa da kólik kompanııalarymen kelissózder júrgizilýde. Japondyq dıplomat Qorǵastyń bolashaǵynyń zor ekendigin aıta kelip, Chýnchın-Dýısbýrg konteınerlik poıyzynyń jolǵa shyǵarylýyn da joǵary baǵalady.