«Dıplomat» qonaqúıine qatysty Arystanbek Muhamadıulyn tergeý aıaqtaldy - Antıkor

ASTANA. QazAqparat – Sybaılas jemoqorlyqqa qarsy is-qımyl agenttigi eks-mınıstr, Ulttyq mýzeıdiń eks-basshysy Arystanbek Muhamadıulyna qatysty is boıynsha jala jabý faktisimen sotqa deıingi tergeý bastaýy múmkin, dep habarlaıdy QazAqparat tilshisi.

«Keıbir BAQ pen áleýmettik jelide, messendjerlerde burynǵy Mádenıet jáne sport mınıstri Arystanbek Muhamadıulyna qatysty sot protsesiniń vıdeosy men sybaılas jemqorlyqqa qarsy qyzmet qyzmetkerleriniń «Dıplomat» qonaqúıin úshinshi tulǵalarǵa jazyp berip, 111 mln teńge kóleminde shyǵyn óteýge májbúrlegeni týraly aqparat tarady. Bul aqparat shyndyqqa janaspaıtynyn habarlaımyz. Muhamedıuly 221 mln teńge jymqyrdy degen kúdikke ilinip otyr. Onyń iske qatystylyǵy dáleldenip, prokýratýra maquldady. Endi ol áreketterine qorytyndy baǵany sot beredi», - dep jazylǵan resmı málimette.

Tarap ketken aqparattaǵy 111 mln teńgeniń daýyn da agenttik ókilderi osy 221 mln teńgeniń isimen baılanystyryp otyr.

«Tergeý kezinde jaýapkershiligin jeńildetý úshin keltirilgen zalal ishinara ótelip, 111 mln teńge memleket kirisine aýdarylǵan.

Oǵan qosa, qazirgi tańda «Dıplomat» qonaqúıin reıderlik jolmen tartyp aldy degen kúdikke ilingen Muhamadıulynyń ústinen qosymsha epızod boıynsha tergeý aıaqtaldy.

Osyǵan baılanysty Muhamadıuly sot pen qoǵamdy shatastyrý arqyly jaýapkershilikten jaltarý úshin bul jaıttar týraly jalǵan aqparat bergen.

Jala jabý faktisi boıynsha sotqa deıingi tergeý bastaý týraly másele sheshilip jatyr. Azamattardan resmı derekkózderden shyǵatyn obektıvti aqparatqa ǵana senýdi suraımyz», - delingen agenttiktiń aqparatynda.

Buǵan deıin Arystanbek Muhamedıulynyń jubaıy 111 mln teńgeni memleket esebine aýdarǵany týraly málimet taraǵan.

Eske salaıyq, 19 sáýirde Arystanbek Muhamedıulynyń mýzeı dırektory bolǵan kezdegi orynbasaryn sot zalynan jedel járdem alyp ketken bolatyn.

Buǵan deıingi sot protsesterine A.Muhamadıulynyń ózinen basqa sybaılastary retinde úsh kúdikti tartylyp otyr.