Dıplom satýǵa tyıym salý bilim sapasyn arttyrýǵa yqpal etedi - qoǵam qaıratkeri
«Memleket basshysynyń Qazaqstan halqyna Joldaýyn tyńdap, onda ustaz bedelin arttyrýǵa yqpal etetin tyń bastamalardy estip, taǵy bir marqaıyp qaldyq. Prezıdent az qamtylǵan jáne kópbalaly otbasylardy qoldaý úshin Úkimetke Daryndy balanyń qabiletin damytýdyń «Jol kartasyn» ázirleýi qajettigin alǵa tartty.
Sonymen qatar Úkimet pen ákimder daryndy balalardyń úıirmeler men ortalyqtarǵa, jazǵy lagerlerge barýy úshin múmkindik jasaýy kerektigin eskertip ótti. Joldaýda joǵary bilimniń sapasy jaıly ózimizdiń túlekterdi jumyspen qamtý jaǵynan elimizdegi joǵary oqý oryndarynyń jartysy ǵana 60 paıyzdyq deńgeıge qol jetkizip otyrǵandyǵyna toqtala kelip, olardyń sanyn qysqartý máselesin qaraý kerektigin jetkizdi.
Ásirese, tereń bilim berýdiń ornyna dıplom satýmen aınalysqan ýnıversıtetterimiz bar ekenin basa aıtty. Bul turǵyda osyndaı oqý oryndaryna tyıym salý arqyly bilim berý sapasyn arttyrý qajettigin aıtty», - dedi ol QR Prezıdenti Qasym-Jomart Toqaevtyń bıylǵy Joldaýyna oraı pikir bildire kele.
Sonymen qatar, ol Joldaýda bilim salasy jaıly ózekti bir másele – qarjylandyrýdyń birkelki bolmaýy jáne bilim bólimderin basqarý jáne bıýdjet qarjysyn ákimshilendirý fýnktsııalaryn aýdandyq deńgeıden oblystyq deńgeıge berý, derbes qarjylandyrý tártibin engizý, oqýlyq sapasy men ustazdar jalaqysyn arttyrýǵa nazar aýdarylýy halyqtyń kóńilinen shyqqanyn aıtty.
«Bul Joldaýdaǵy bilim salasyna qatysty eń qajetti másele - oqýlyq sapasynyń tómendigi týraly boldy. Bul jóninde Memleket basshysy oqýshylardy sapaly oqýlyqtarmen qamtamasyz etý – tıisti mınıstrliktiń tikeleı mindeti ekendigin aıtty. Joldaýdaǵy ustazdar qaýymyna qatysty qýanyshty jańalyq muǵalimder men oqytýshylardyń áleýmettik jaǵdaıyn jaqsartýmen balanysty boldy. Tamyz konferentsııasynda Memleket basshysy aldaǵy tórt jyl ishinde muǵalimderdiń eńbek aqysyn eki ese arttyrýdy tapsyrǵan bolatyn. Aldaǵy jyldan bastap ustazdardyń jalaqysy 25 paıyzǵa ósetini ustazdar qaýymyn bir serpiltip tastady.
Osylaısha, Memleket basshysynyń Joldaýy bilimniń ózekti máselelerin qozǵaýymen kóńilimizden shyqty. Bul jolǵy Joldaý oqytýdyń ózekti máseleleriniń sheshilýi men ustaz bedeliniń artýyna yqpal eterine kámil senemiz», - dep túıindedi Sádibek Túgel.