Dıplom máńgi azyq bolmaıdy, ómir boıy oqy jáne úıren - Qasym-Jomart Toqaev

<p>Eńbek naryǵy jyldam ózgerip jatqan zaman talabyna beıimdele bilý qajet. Respýblıkalyq pedagogter sezinde sóılegen sózinde Prezıdent osy máseleniń astyna syzyp aıtty, dep habarlaıdy <a href="https://kaz.inform.kz/" target="_blank" rel="noopener">QazAqparat</a> Aqordaǵa silteme jasap.</p>

«Ekinshi másele, balalarymyz zamanǵa saı ozyq bilim alýy qajet. Qazir eńbek naryǵy óte jyldam ózgerýde. Kóptegen salaǵa jasandy ıntellekt enip jatyr. Bul úderis jyldan jylǵa qarqyn ala beretini sózsiz. Búgin joǵary suranysqa ıe mamandyq erteń qajet bolmaı qalýy múmkin. Ǵalymdar 2050 jylǵa qaraı qazirgi kásipterdiń jartysyna jýyǵyn tsıfrlyq jáne tehnıkalyq júıeler almastyrady degen boljam aıtyp otyr. Sondyqtan, azamattarymyz jańa zamanǵa qajetti daǵdylardy úırenýi kerek. Bul – óte mańyzdy mindet», - dedi Memleket basshysy.

Demek, zaman talabyna qaraı beıimdeli bilý qajet.

«Buryn «alǵan dıplomyń ómir boıy azyq bolady» degen túsinik bar edi. Endi onyń ornyn «Ómir boıy oqy jáne úıren» degen qaǵıda basýy kerek. Qazir jumys berýshiler úshin eń bastysy dıplom nemese sertıfıkat emes. Olar izdene biletin, jańa talapqa ıkemdele alatyn, tártipti jáne uqypty jas mamandardy baǵalaıdy, ıaǵnı qyzmetkerdiń qolyndaǵy qaǵazǵa emes, qarym-qabiletine mán beredi. Sondyqtan, ár azamat úzdiksiz oqýy kerek. Osyndaı bilimge qushtarlyqty balanyń boıyna mektepten bastap sińirý qajet, ıaǵnı balalarymyz bilikti maman bolsyn desek, eń aldymen, orta bilim sapaly bolýy kerek», - dedi Prezıdent.

Aıta ketsek, búgin Qazaqstanda Ustazdar kúni.

Prezıdent Qasym-Jomart Toqaev respýblıkalyq pedagogter sezinde sóz sóıledi.