Dinı uıymdar karantın kezindegi usynystardy qoldap jatyr - Erjan Núkejanov

NUR-SULTAN. QazAqparat – Tótenshe jaǵdaı kezindegi shekteýlerge elimizdegi barsha dinı uıymdar qoldaý jasady. Bul týraly Aqparat jáne qoǵamdyq damý mınıstrligi Din isteri komıtetiniń tóraǵasy Erjan Núkejanov málim etti, dep habarlaıdy QazAqparat tilshisi.

Memlekettik komıssııasynyń sheshimimen tótenshe jaǵdaı rejımi elimizde sáýir aıynyń sońyna deıin sozylǵanyn eske salǵan komıtet basshysy: «Sonymen qatar, 3 sáýirde Aqparat jáne qoǵamdyq damý mınıstri Dáýren Abaev arnaıy brıfıng ótkizip, osy din salasyndaǵy azamattarǵa, el halqyna, dinı birlestikterge ustanymdaryn aıtqan bolatyn. Bul ustanymdar boıynsha jalpy dinı rásimderdi ótkizý kezinde halyqty kóp jınamaý, sondaı-aq turǵyndarǵa aqparatty berip turý úshin onlaın formatyn engizý usynylǵan bolatyn. Qýantarlyq jaǵdaı, elimizdegi barsha dinı uıymdar tarapynan bul usynystar qoldaý taýyp jatyr», - dedi.

Osy oraıda ol engizilgen shekteýler ýaqytsha is-sharalar ekenin, ıaǵnı tótenshe jaǵdaı merzimi aıaqtalǵannan keıin, barlyq rásimder burynǵysynsha óz qalpyna oralatynyn eske saldy.

«Biz árbir Qazaqstan azamatynyń ar-ujdanyna, dinı senimine úlken qurmetpen qaraımyz. Bul bizdiń jalpy ustanymymyz. Qazirgi jaǵdaıda bizdiń azamattardyń densaýlyǵy, qaýipsizdigi birinshi orynda tur, sondyqtan osyndaı is-sharalarǵa barýǵa májbúrmiz», - dedi Erjan Núkejanov.

Budan buryn habarlanǵandaı, Naýryzbaı qajy Taǵanuly bıyl elimizde Ramazan aıy 24 sáýir kúni bastalatynyn aıtty.

Sonymen qatar meshitterde, qoǵamdyq oryndarda aýyzashar berý ýaqytsha toqtatylatyny túsindirildi.