Dinı ýaǵyzdyń qanshalyqty durys baǵytta ekenin saraptap otyrý qajet - Berik Beısenuly

ALMATY. QazAqparat – Bireýler sáýegeılik tanytyp, «Salafızm – Qudaı bergen qasıetti is» deıdi. Bul durys emes. Men jaman jaqtary men jaqsy jaqtary jaıly aıtqym keledi. Jýrnalıst Berik Beısenuly osyndaı pikir bildirdi, dep habarlaıdy QazAqparat tilshisi.

Berik Beısenulynyń aıtýynsha, dinniń syrtqy sıpatyna basymdyq berilip, naǵyz ishki rýhanı jaǵyna zııany tıdi. Imandylyq jaıly aıtylmaı, saqal ósirý jaıly úgit-nasıhat belsendi júrgizildi. Shyndyǵynda kıim sııaqty syrtqy máseleler mańyzdy emes.

«Ýaǵyz» degen jeleýmen halyqty «din ustanatyndar» men «din ustanbaıtyndarǵa» bóldi. Ásirese jastar arasynda. Salafızm sheıhteri «teledıdar haram» dep pátýa berdi, alaıda ózderi onda sóıleýge qarsy bolmady. «Teledıdar kórýdi, fotoǵa túsip, án aıtýdy haram» dedi. Salafızm nasıhaty kezinde toılar qaraly jıynǵa aınaldy. Meıramda qýaný, qaıǵyda muńaıý kerek. Mine durys ıslam osy»,- dedi Berik Beısenuly.

Onyń oıynsha, Salafızm qozǵalysynyń qateligi – onyń úndeýiniń qatygezdiginde.

«Munyń bárine sebep – Saýd Arabııasy koroldigi múftııatynyń úlken ǵalymdary keńesinen alshaqtaýy, tájirıbe men biliminiń joqtyǵy. Bizdiń úndeýimiz izgilikti, raqymdy dinge qarsy keldik, adamdarǵa qysymshylyq keltirdik. Saýd Arabııasy koroldigi halqy aldynda salafızm qozǵalysy atynan keshirim suraımyn». Bul salafızm baǵytyndaǵy kórnekti tulǵalardyń biri sheıh Aıd ál –Karnıdiń sózi. Budan shyǵatyn túıin ne? Álemdik qaýipsizdikke úlken qaterin tóndirip otyrǵan qozǵalystyń beldi basshylarynyń biri aqyry óz qateligin moıyndady. Ýaqyt óte kele musylman áleminen keshirim surady. Biraq endi kesh. Nege? Óıtkeni bul qozǵalystyń qylmystyq áreketteri qazir ǵalamdy kezip júr. Qanshama azamattar sheıh aıtqandaı, bilimderiniń taıazdyǵynan osy aǵymǵa erip, soqyr senimge boı urdy. Bul ásirese jastarǵa tán. Qanshama jastar aǵaıyn-týystan jeridi, ata- anadan irgesin aýlaq saldy. Oǵan kim kináli? Árıne, ózimiz. Joqty-bardy, aqty-qarany naqtylap ýaqytynda kórsete almadyq», -deıdi jýrnalıst.

Berik Beısenulynyń pikirinshe, dinı ýaǵyzdyń qanshalyqty durys baǵytta ekenin baǵamdap, saraptap otyrý qajet.

«Jalpy bul jaıtty qarapaıym mysalmen keltirer bolsaq, jastardyń durys dinı jolda kele jatqanyn aıtyp otyratyn kókiregi oıaý qart qajet. Aýyl aqsaqaly kerek. Aýyldan, orta mektepten túlep ushqan bala es jııar shaqta qalaǵa kelgen sátte, joq nárseniń ornyn rýhanı azyq retinde dinmen toltyrǵysy keledi. Al dinniń bári dińgek pe?! Negizi «balany jastan», dep beker aıtpaǵan el edik qoı. Rýhanı jany tereń, jady myqty, otanshyldyq rýhpen tárbıelengen bala nemese otbasynda qazaqy tárbıeni boıyna tereń sińirip ósken jas eshqashan adaspaıdy»,-deıdi ol.

Sonymen qatar, Berik Beısenuly din máselesi óte názik ekendigin, abaılamasa, baqylamasa bolmaıtynyn atap ótti.

«Tarıhtan belgili, dinaralyq soǵys talaı memlekettiń irgesin shaıqaltqan. Otbasyndaǵy dinaralyq san alýan kózqaras talaı shańyraqty ortasyna túsirgen. Bala ákeden bezip, ata men ana kóz jasyn kóldeı qylǵan. Munyń barlyǵy memlekettik baqylaýdyń bolmaýynan, otbasynda ulttyq qundylyqtardyń olqy soǵýynan oryn aldy. «Qaı jerde qatelik jiberdik?» degen saýalǵa berer jaýap osy. Qazir Allaǵa shúkir, memleket tarapynan baqylaý bar. Jastar da dinı aǵymdardyń san alýan saıasatyn, máseleniń aq-qarasyn ańǵara bastady»,- dep sózin túıindedi ol.