Dinı saladaǵy zańnamaǵa engiziletin ózgeristerdi qaraý úshin arnaıy jumys toby quryldy
«Memlekettik-konfessııalyq jáne konfessııaaralyq qarym-qatynasty jetildirý boıynsha resmı kózqarastardyń júıesin anyqtaý maqsatynda mınıstrlik «Din salasyndaǵy memlekettik saıasattyń 2017-2020 jyldarǵa arnalǵan tujyrymdamasyn» ázirledi. Tujyrymdama din salasyndaǵy memlekettik saıasattyń ary qaraı damýyn, quqyqtyq normatıvti aktiler júıesin, din salasyn retteý boıynsha áleýmettik-ekonomıkalyq, saıası jáne basqarý sharalardy jetildirýdi kózdeıdi», - delingen habarlamada.
Sonymen qatar, mınısterlik «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» zań jobasyn ázirleýdi bastady. Qazirgi tańda zań jobasy ázirlený ústinde. Jobany jasaqtaýǵa ekspertter, ǵylymı qaýymdastyqtyń, memlekettik organdardyń jáne úkimettik emes uıymdardyń ókilderi tartylǵan. Arnaıy jumys toby quryldy.
Zań jobasynda «qudaıǵa qulshylyq etý», «dinı ádebıet», «dinı radıkalızm», «destrýktıvti dinı aǵym» jáne t.b. uǵymdardyń anyqtamasy naqtylanady. Termınderdi naqtylaý birkelki túsiný men normatıvti tájirıbede biregeı qoldanýdy qamtamasyz etedi. Bul sońǵy kezderi keıbir tulǵalardyń terrorızm men ekstremızmge úndeý bolmasa da, maǵynasy jaǵynan dinı dogmalardy radıkaldy turǵydan uǵynatyn is-áreket pen sózderdi paıdalanýymen túsindiriledi.
Sonymen qatar, zań jobasy shetelde dinı bilim alýdy retteýdi kózdeıdi. Qazir qazaqstandyqtardyń shetelde dinı bilim alýyna shekteý qoıý týraly ekspertterdiń usynysy qarastyrylyp jatyr. Degenmen, resmı tirkelgen dinı birlestikterdiń joldamasy bolǵan jaǵdaıda, shetelde dinı bilim alý múmkindigne shekteý qoıylmaıdy.
Jobada dinge degen kózqarasyna qaramastan barlyq azamattardyń quqyqtaryn qorǵaıtyn normalar naqtylanatyn bolady. Onyń ishinde, dinge qatysty azamattardyń sezimderin qasaqana qorlaýǵa, kemsitýge jol bermeý máselesi qarastyrylady. Qazirgi tańda mınıstrlikke destrýktıvti dinı aǵymdardyń ókilderi tarapynan halyqtyń dindar jáne belgili bir dindi ustanbaıtyn bóligin senbeýshilikke aıyptaý, sezimderin qorlaý men belgili bir dinge qatystylyǵyna oraı kemsitý faktileri boıynsha azamattardan ótinishter túsýde.
Taǵy bir ózgeris retinde kámeletke tolmaǵan jasóspirimderdi dinı qyzmetke zańsyz tartý kózdeledi.
Budan bólek dinı birlestikterdiń qarjylyq ashyqtyǵyn qamtamasyz etý, dinı ádebıetti taratý boıynsha jaýapkershilikti arttyrý, qoǵamdyq oryndarda adamnyń túrin tanýǵa kedergi keltiretin kıimderge zańmen tyıym salý, jáne t.b. ózgeristerdi engizý qarastyrylýda.
Bul ózgeristerdiń barlyǵy qoǵam tarapynan (ekspertter, dinı birlestikterdiń, úkimettik emes uıymdardyń ókilderi, azamattar) kelip túskenin atap ótý kerek.
«Qazirgi tańda zań jobasy ázirleý ústinde. Ózgerister muqııat zerttelip, jobaǵa engizilgennen keıin keń talqylaýǵa shaǵyralatyn bolady», - delingen habarlamada.