Dinı máseleler boıynsha 114 jelisine habarlasyp, aqyl-keńes alýǵa bolady

NUR-SULTAN. QazAqparat - QR Aqparat jáne qoǵamdyq damý mınıstrliginiń qoldaýymen din máseleleri boıynsha 114 qaýyrt jelisi jumys istep tur, dep habarlaıdy QazAqparat tilshisi.

Jobanyń jumysyn 2020 jyldyń tamyz aıynda mınıstrliktiń qoldaýymen «Azamattyq bastamalardy qoldaý ortalyǵy» KEAQ memlekettik granty aıasynda «Social Development Center» qoǵamdyq qory bastady.

114 qaýyrt jelisi - dinge qatysty máseleler boıynsha kómekke muqtaj barlyq adamdar úshin tegin senim telefony jáne chat-saıt. Quramynda tanymal psıholog, QR psıhologtar men psıhoterapevter qaýymdastyǵynyń múshesi – Lola Shakımova, «Jýsan» arnaıy operatsııasyna qatysýshy, teolog – Aslanbek Tynyshtyqov, zańger, PhD doktor – Serikhan Ádilǵazy sekildi belgili mamandar men dintaný jáne ıslamtaný salasyndaǵy sarapshylar, ońaltý ortalyqtarynyń teologtary bar tájirıbeli mamandar toby aqyl-keńes beredi.

Búgingi tańda 114 qaýyrt jelisi»h óz jumysynyń tıimdiligin dáleldep otyr. Kún saıyn operatorlar 20-dan 40-qa deıin ótinishter qabyldaıdy. Mamandar máseleniń sıpatyna baılanysty ár jeke jaǵdaıdy bólek taldaıdy.

Olar kóbine dindar adamdar men qarapaıym adamdardyń qarym-qatynasy, bala tárbıesindegi dinniń róli, ıslamdaǵy neke jáne dástúr sııaqty taqyryptarǵa suraqtar qoıady.

Taǵy bir jıi qozǵalatyn másele - pandemııa kezinde dinı rásimderdi oryndaý. Keı jaǵdaılarda destrýktıvti aǵymdardyń, túrli sektalardyń habarlasýshynyń jaqyn týystaryna tikeleı yqpal etip jatqany jaıly sóz bolady. Mundaı adamdarǵa kásibı psıhologııalyq qoldaý kórsetiledi.

Qandaı jaǵdaıda 114 qaýyrt jelisine júginý qajet?

Eger sizge din máseleleri boıynsha aqparattyq jáne konsýltatsııalyq kómek qajet bolsa.

Eger siz destrýktıvti dinı aǵymdardyń yqpalyna tússeńiz.

Eger Sizge dinı máselelerge baılanysty psıhologııalyq jáne zańgerlik kómek qajet bolsa.

«114 qaýyrt jeli» mamandarymen qalaı baılanysýǵa bolady?

Habarlasý úshin ózińizge yńǵaıly ádisti tańdaı alasyz:

114 nemese 8(800)-0805-114 qysqa nómirine qońyraý shalyńyz.

Nemese jobanyń 114.kz/questions saıtynan onlaın-keńes alyńyz.

Jedel jeli Nur-Sultan ýaqyty boıynsha saǵat 9:00-18:00 aralyǵynda aptasyna 7 kún jumys isteıdi. Barlyq konsýltatsııalar tegin jáne qupııa túrde ótedi.