Dinı kózqarasqa baılanysty vaktsınatsııadan bas tartqan durys emes - mınıstr Birtanov

ASTANA. QazAqparat - QR Densaýlyq saqtaý mınıstri Eljan Birtanovtyń aıtýynsha, búginde jyl saıynǵy vaktsınatsııadan bas tartyp jatqan azamattar az emes. Sonyń ishinde dinı kózqarasqa baılanysty óz balasyna ekpe salmaıtyndar da bar, dep xabarlaıdy QazAqparat tilshisi.

«Negizi, xalyqtyń basym bóligi vaktsınatsııany qoldaıdy. Alaıda odan bas tartyp jatqandardyń kóbeıip jatqany baıqalady. Sońǵy bes jyldyń ishinde ondaı azamattardyń sany 3 myńnan 9,7 myńǵa ósti. Biz osy máseleni zerdelep shyqtyq. Vaktsınadan bas tartýdyń birneshe sebebi bar. Birinshiden dinı nanym-senimge baılanysty bas tartady. Ondaı jaǵdaılardyń sany 43 paıyzdy qurap otyr. Qalǵandary vaktsınanyń sapasyna kúdiktenip, jaǵymsyz aqparattyń saldarynan senimsizdik tanytyp jatady», - dedi Eljan Birtanov búgin xalyq aldyndaǵy kezdesý kezinde.

Mınıstr sharaǵa qatysqan jáne ony onlaın rejımde tyńdaǵan adamdardy vaktsınatsııa máselesine jaýapty bolýǵa úndedi. Ásirese, balalarǵa ekpe salýdyń mańyzdylyǵyn umytpaý qajet.

«Mınıstrlik vaktsınatsııa máselesin jan-jaqty túsindirip keledi. Soǵan qaramastan, ekpeden bas tartyp jatqandar az emes. Sol sebepti qoǵamdyq densaýlyqty saqtaý qyzmetteri osy jumyspen tyǵyz aınalysýy qajet»,- dep atap kórsetti mınıstr.