Dinı fanatızm psıhıkalyq aýytqýdyń bir túri - sarapshylar

ASTANA. QazAqparat - 27-29 shilde aralyǵynda «Áziret Sultan» astanalyq meshitinde Din isteri jáne azamattyq qoǵam mınıstrligi Din isteri komıtetiniń tapsyrysy boıynsha  «Terrorızmge qarsy komıtet» qoǵamdyq birlestigi teologtardyń tobyna semınar-trenıng ótkizýde, dep habardaıdy Din isteri komıtetiniń baspasóz qyzmeti.

Іs-shara «Radıkaldyq dinı kózqarastary bar adamdarǵa teologııalyq ońaltýdy uıymdastyrý (erkin jamaǵattar)» jobasy sheńberinde iske asyrylýda. Jobanyń negizgi maqsaty - teologııalyq ońaltý máseleleri boıynsha mamandardy destrýktıvti dinı aǵymdardyń erýshilerimen, onyń ishinde radıkaldy kózqarastary bar adamdarmen jumys jasaýǵa qajetti bilim men daǵdylarǵa baýlý bolyp tabylady.

«Terrorızmge qarsy komıtet» RQB Prezıdıýmynyń tóraǵasy Amanjol Orazbaevtyń málimdeýine sáıkes, destrýktıvti dinı aǵymdardyń jaqtastaryn ońaltý jáne beıimdeý boıynsha qalyptastyrylǵan ádistemelik qaǵıdalardy aprobatsııalaý jáne endirý boıynsha pılottyq joba elimizdiń segiz óńiri men Astana qalasynda synalatyn bolady.

Birinshi kezeńde trenıng negizinen Qazaqstan musylmandary dinı basqarmasynyń ımamdary arasynan neǵurlym daıyndalǵan 14 teolog úshin ótkiziledi.

«Terrorızmge qarsy komıtet» dárister men trenıngter taqyryptaryn tańdaýǵa erekshe kóńil bóldi, olardy ótkizý úshin joǵary bilikti mamandar shaqyryldy - psıholog Shakımova Lola Sergeevna, dintanýshy Denısenko ıÝlııa Olegovna. Birqatar shetel ǵalymdary men sarapshylardyń pikirlerine sáıkes, dinı fanatızm psıhıkalyq aýytqýdyń bir túri bolyp tabylady.

Semınarda ońaltý jumystarynyń teologııalyq aspektileri daıyndalǵan teologtarmen, onyń ishinde QMDB bólim basshysy Ershat Ońǵarovpen túsindiriledi.

Semınar barysynda destrýktıvti aǵymdarǵa erý sebepteri, radıkaldyq kózqarastarǵa erý jáne odan bas tartý belgileri, psevdodinı aǵymdardyń sıpattamalary jáne t.b. sııaqty suraqtar qarastyryldy.

Trenıngterde ártúrli psıhologııalyq tehnıkalar men ádister qarastyrylady. Testtik rejımde keıingi is-qımyldar algorıtmin pysyqtaýmen kúrdeli sıtýatsııalyq dıalogtar oryndalýda.

Semınar qatysýshylaryna psıhologııalyq baılanysty ornatý, keńes berýlerdi ótkizý, ońaltylatyn adamdarǵa teologııalyq, quqyqtyq, áleýmettik kómek jáne qoldaý kórsetý boıynsha ádistemelik usynymdar usynyldy.

Dinı ekstremızm men radıkalızm kórinisteriniń aldyn alý máseleleri boıynsha memlekettiń úkimettik emes sektormen jáne dinı birlestikpen áleýmettik áriptestiginiń atalǵan jobasy jergilikti jerlerde júrgizilip otyrǵan núkteli ońaltý jumysyn  odan ári kúsheıtýdi kózdeıdi.