Dinı basqarma Taraz qalasynda halyqaralyq ǵylymı-tanymdyq jıyn ótkizip jatyr

TARAZ. QazAqparat - Taraz qalasynda Qazaqstan musylmandary dinı basqarmasynyń uıymdastyrýymen «Qarahan memleketi tusyndaǵy Islam» taqyrybynda halyqaralyq ǵylymı-tanymdyq konferentsııa ótip jatyr. Jıynǵa Qazaqstan musylmandary dinı basqarmasynyń tóraǵasy Naýryzbaı qajy Taǵanuly arnaıy keldi, dep habarlaıdy QazAqparat tilshisi.

Bas múftı saparyn aldymen Qarahan baba kesenesine arnaıy zııarat etýden bastady. Bas múftı Taraz qalasynda ótetin halyqaralyq konferentsııa qatysýshylarymen birge baba rýhyna Quran baǵyshtady.

Konferentsııaǵa Túrkııa, Ózbekstan, Qyrǵyzstan jáne Qazaqstan ǵalymdary qatysyp, Qarahan dáýirindegi Islam dini, jazba eskertkishter, ádebı jádigerler taqyrybynda baıandama jasaıdy. Sondaı-aq, bas múftıdiń qatysýymen oblystyq «hıbatýlla Tarazı» ortalyq meshitiniń janyndaǵy «Qamqor-sharapat» salttyq qyzmet ortalyǵynyń, Aısha bıbi aýylynda ornalasqan «hıbatýlla Tarazı» medrese-kolledjiniń qosalqy «Beıbit ata» ǵımaratynyń ashylýyna qatysyp, oblys sportshylarymen kezdesýi ótedi dep josparlanǵan.

Aıta keteıik, buǵan deıin Naýryzbaı qajy Prezıdentke dinı basqarmanyń jumysy jóninde baıandaǵanyn jazǵan bolatynbyz. Naýryzbaı qajy Taǵanuly Qazaqstan musylmandary dinı basqarmasynyń qoǵamda dástúrli ıslam dinin keńinen dáripteý jáne el ıgiligi men birligi jolynda atqaryp jatqan jumystary jóninde baıandady.