Dinı basqarma Mańǵystaý oblysynda sport keshenin salyp, el ıgiligine tapsyrdy

AQTAÝ. QazAqparat - Búgin Qazaqstan musylmandary dinı basqarmasy Mańǵystaý oblysy Mańǵystaý aýylynda salynǵan sport keshenin óńir turǵyndarynyń ıgiligine berdi, dep habarlaıdy QazAqparat basqarmanyń resmı saıtyna silteme jasap.

Sport kesheniniń ashylý saltanatyna Bas múftı Naýryzbaı qajy Taǵanuly, Mańǵystaý oblysynyń ákimi Serikbaı Ótelgenuly Trumov qatysty.

Igi is-sharada sóz alǵan Bas múftı: «Ózderińiz jaqsy bilesizder, biz ótken jyly 30 jyldyq mereıtoıymyzdyń aıasynda shalǵaı aýyldarǵa qudyq, kópir, emhana, jol salýǵa úles qostyq. Osynaý izgi isimizdiń jalǵasy retinde búgin sport keshenin halyq ıgiligine berip otyrmyz. Meshit, medirese salýdyń saýaby qandaı úlken bolsa, el ıgiligi úshin berilgen kópir, jol, emhana qudyq, sport kesheni syndy ǵımarattardy turǵyzý sondaı qaıyrly istiń biri. Osy iske úles qosqan barsha azamattarǵa Alla razy bolsyn deımin. Biz memlekettiń buqaralyq sportty damytýǵa arnalǵan bastamalaryna úles qosýdy jalǵastyra beremiz. Óıtkeni jastardyń jany men tán saýlyǵy - mańyzdy másele. Oǵan úles qosý – barshaǵa ortaq is. Ǵalymdarymyz: «Atqa miný, sadaq atý, kúres pen júgirý – sozylmaly aýrýlardyń birden-bir daýasy» degen. Dene shynyqtyrý adam balasynyń tánin ǵana damytyp qoımaı, rýhanı jaqtan da tárbıeleıdi. Óz nápsisin jeńýge, óz denesin ózine baǵyndyrýǵa járdemdesedi. Óıtkeni, ol – qýat. Dene qýaty, oı ushqyrlyǵy, ıman qýaty – er jigittiń kórkemdigi», - dep atap ótti.

Sondaı-aq Mańǵystaý oblysynyń ákimi Serikbaı Trumov sport kesheniniń ashylý rásiminde ımamdardyń qaıyrymdylyq jumystarǵa belsendi túrde atsalysatyndyǵyn aıtty. «Barsha din qyzmetkerlerine shynaıy alǵysymdy bildiremin. Osy keshennen myqty sportshylar shyǵýyna tilektespin», - dedi ol.

Aıta ketsek, sport kesheniniń jalpy aýmaǵy – 1300 sharshy metr. Ǵımarat halyqaralyq talaptarǵa sáıkes salynǵan.