Dinder sezi qarsańynda astanada etnoaýyl boı kóterdi

NUR-SULTAN. QazAqparat – Búgin Nur-Sultan qalasynda «Uly dala sazy» atty etnofestıval bastalady. Shara 5 kún boıy ótedi. Bul týraly Nur-Sultan qalasynyń mádenıet basqarmasy basshysynyń orynbasary Nuran Kamzın málim etti, dep habarlaıdy QazAqparat tilshisi.

Málim bolǵandaı, 14-15 qyrkúıek kúnderi elordada ótetin Dinder kóshbasshylarynyń sezi qarsańynda etnoaýyl boı kóteredi.

«12-16 qyrkúıek kúnderi elordada «Uly dala sazy» atty etno-festıval ótedi. Aýqymdy mádenı shara zamanaýı etnıkalyq janrda bolmaq. Festıvaldi ótkizýdegi maqsat– týrısterdi, sezge qatysýshylardy (Dinder kóshbasshylarynyń sezi – avtor) uly dalanyń murageri – qazaq halqynyń baı mádenıetimen tanystyrý. Sharada dástúrli oryndaýshylyq ónerdiń ókilderi, etno-folklorlyq ujymdar men basqa da tanymal óner ıeleri óner kórsetedi», - dedi Nuran Kamzın elorda ákimdiginde ótken baspasóz máslıhatynda.

Onyń aıtýynsha, etnofestıval «Báıterek» monýmentiniń janynda ornalasqan etnoaýylda ótedi.

«Ol jerde segiz qanatty kıiz úıler, altybaqandar ornatylady. Sonymen qatar qolóner sheberleriniń jumystaryn kórsetetin «Sheberler aýyly», shaǵyn sáýlet nysandary jáne taǵy basqa alańdar uıymdastyrylady», - deıdi ol.

Bes kún boıy ótetin festıval saǵat 10:00-den 19:00-ge deıin jalǵasady.

Sharaǵa kelýshiler kıiz úılerge kirip, kóshpendi halyqtyń mádenıetimen jáne turmysymen tanysa alady. Festıvaldiń kontserttik bólimi kún saıyn 18:00-de bastalyp, 20:00-ge deıin jalǵasady.

Foto: Nur-Sultan qalasynyń ákimdigi