Dınara Zakıeva Soltústik Qazaqstan turǵynynyń «Ulymdy urlap ketti» degen málimdemesine jaýap berdi

<p>ASTANA. KAZINFORM - QR Bala quqyqtary jónindegi ýákil Dınara Zakıeva <a href="https://www.instagram.com/stories/zakiyevadinara/3468654701857250613/" target="_blank" rel="noopener">Instagram</a> jelisindegi paraqshasynda Soltústik Qazaqstanda túrli jaraqatpen aýrýhanaǵa túsken tórt jasar balaǵa qatysty jańa málimet jarııalady.</p>

Dınara Zákıevanyń aıtýynsha, 23 qyrkúıekte Petropavl turǵynynyń tórt jasar balasy (kenje uly) «oń jaq bilektiń eki súıeginiń jabyq synýy, keýde, arqa, jambas jáne tize býyndarynyń, jynys múshesiniń kógerýi» dıagnozymen aýrýhanaǵa túsken. Anasynyń aıtýynsha, bala baspaldaqtan qulaǵan. Alaıda dárigerler bul jaraqat tek qulaǵannan bolýy múmkin emesin jáne zorlyq-zombylyqtyń saldary bolýy múmkin ekenin kórsetti.

Osy oqıǵa boıynsha Qylmystyq kodekstiń 107-baby 8-tarmaǵy boıynsha (Kámeletke tolmaǵan balaǵa qatysty densaýlyqqa qasaqana ortasha aýyrlyqtaǵy zııan keltirý) qylmystyq is qozǵaldy.

Dınara Zákıeva áıeldiń úlken uly balalardy qoldaý ortalyǵyna ornalastyrylǵanyn atap ótti. Al anasy kenje ulyn ertip, aýrýhanadan qashyp ketken. Birneshe kúnnen keıin tabylyp, bala qaıtadan aýrýhanaǵa jatqyzylǵan.

«Tergeý barysynda anasy polıtsııa departamentiniń qaýlysymen balanyń múddesin qorǵaýdan shettetildi», - dedi Dınara Zákıeva.

Bala quqyqtary jónindegi ýákil denesi kógergen balanyń sýretin jarııalap, onyń saý jeri qalmaǵanyn jazdy.

Aıta keteıik, áleýmettik jelide Petropavl turǵyny beınejazba jarııalap, kenje ulymen aýrýhanada jatqanda, qamqorshylyq organdary úlken balasyn urlap ketkenin aıtqan. Áıeldiń aıtýynsha, onyń kenje uly baspaldaqtan qulap, jaraqat alǵan. 

Biraq polıtseıler densaýlyqqa qasaqana zııan keltirý deregi boıynsha qylmystyq is qozǵaǵanyn aıtty. Qamqorshylyq organdary áıeldiń aıyptaýyna jaýap berip, balanyń úlkeni ata-anasynyń qaraýynsyz qalǵandyqtan arnaıy ortalyqqa ornalastyrǵanyn atap ótti.