Dınara Sádýaqasova: Qazaqstandyqtardyń úmitin aqtaý – úlken jaýapkershilik
«Men úshin bul - úlken mártebe. Osyndaı quttyqtaýlardy, sondaı-aq jyly lebizder men tilekterdi alǵanyma óte rıza boldym. Prezıdentke qazaq sportshylarynyń eren eńbegine nazar aýdarǵany úshin úlken alǵys aıtqym keledi. Kimge bolsa da bul úlken yntalandyrý men motıvatsııa beredi. Onyń ústine, qazaqstandyqtardyń úmitin aqtaý, jańa belesterdi baǵyndyrý – úlken jaýapkershilik», - dep jazdy ol.
Sonymen qatar shahmatshy sportshylardyń jetistikterine nazar aýdarýdyń óskeleń urpaqqa úlken áser etetinin aıtty.
«Mundaı marapat jas shahmatshylarǵa da áser etedi. Meniń shahmat akademııamda myńdaǵan túrli ortadan shyqqan balalar bilim alyp júr. Qazirdiń ózinde olar maǵan messendjerlerde jáne áleýmettik jelilerde habarlamalar jiberip, meniń osyndaı quttyqtaý alǵanyma qanshalyqty qýanyshty ekenderin jazyp jatyr. Sondaı-aq jaqyn arada ózderi de sol sekildi úlken jetistikterge jetetinderin aıtady. Dál solaı bolatynyna men de senimdimi. Kóp rahmet» - dep atap ótti shahmatshy.
Eske salsaq, Almaty qalasynda shahmattan ótip jatqan álem chempıonatynda qazaqstandyq Dınara Sádýaqasova rapıdten kúmis júldeger atandy. Osy jeńisimen Dınarany Memleket basshysy Qasym-Jomart Toqaev quttyqtady. Keıin Dınara Sádýaqasova óziniń jeńisi týraly pikir bildirdi.
Atalǵan týrnır úsh kún boıy – 26-28 jeltoqsan aralyǵynda Almatyda ótti. Oǵan Qytaı, Úndistan, Reseı jáne taǵy basqa shahmatty dástúrli túrde damytqan, sportshylary myqty elderdiń atynan shyqqan álemniń úzdik oıynshylary qatysty.
Foto: facebook.com/dinara.saduakassova