Dına Nurpeıisova eskertkishi aldynda balǵyn ónerpazdar kontsert qoıdy
Nur-Sultan qalalyq qoǵamdyq keńesi, qalalyq jastar saıasaty basqarmasy jáne «Kúı anasy» respýblıkalyq qory uıymdastyrǵan kúı keshine Batys Qazaqstan oblysy, Jańaqala aýdanyndaǵy Qalı Jantileýov atyndaǵy balalar mýzyka mektebiniń elýge jýyq shákirti arnaıy kelip qatysty.
Qolyna dombyra ustaǵan baldyrǵandardy kórermender ystyq yqylaspen qarsy aldy. Olar Qurmanǵazy men Dınanyń kúılerin oryndap, qoshemetke bólendi.
Q.Jantileýov atyndaǵy balalar mýzyka mektebiniń ustazy, D.Nurpeıisovanyń shyǵarmashylyǵy men ómir jolyn zertteýshisi Gúlbar Shýaqbaeva elorda jurtshylyǵyna Aq Jaıyq óńiriniń sálemin jetkizdi.
«Biz Dına sheshemizdiń týǵan jerinen kelip turmyz. 43 baldyrǵan Dına eskertkishine gúl shoǵyn qoıyp, «Kúı jármeńkesinde» ónerin ortaǵa saldy. Balalardyń qýanyshynda shek joq. Sharshaý, jabyrqaý degendi bilmeıdi. Elordanyń kórikti jerlerin aralap, bala qııaldary kókke samǵady. «Balapan» telearnasyna suhbattar berip, kóńilderi ósip, kúsh-qýat pen úlken shabyt aldy», - dedi G.Shýaqbaeva.
Birinshi «Kúı jármeńkesiniń» jeńimpazy Nargız Qasymova, Qazaq ulttyq óner ýnıversıtetiniń stýdenti Aqedil Uzaqov birneshe kúı tartyp berdi. Sondaı-aq atalǵan ýnıversıtettiń stýdentteri Baımuhat Saǵı men Ońǵar Dáýlet kúı aıtysynan úlgi kórsetti.
Sodan keıin jınalǵan qaýym ishinen óz ónerin kórsetemin degen ónerpazdarǵa kezek berildi. Kúı tartýdan saıysqa onnan asa ónerpaz qatysty. Qoǵam qaıratkerleri, belgili ustazdar Aıtjan Toqtaǵan, Orynbaı Dúısen jáne Batyr Temirálıevter qazylyq jasady. Bas júldege ıe bolǵan Qazaq ulttyq óner ýnıversıteti janyndaǵy kolledjdiń ІІІ kýrs stýdenti Ádilhan Shanııarǵa úkili dombyra tabys etildi. Ózge ónerli jastar da túrli syılyqtarmen marapattaldy.
«Kúı anasy» respýblıkalyq qorynyń jetekshisi Tólegen Qýanyshev:
«El aǵalary birinshi ret uıymdastyrǵanda, «Kúı óneri qudiretti ǵoı, balalar tárbıesine yqpaly zor. Turaqty ótkizip turýlaryńyzǵa tilektespiz. Іsterińiz alǵa basa bersin» dep bata bergen edi. Ekinshi «Kúı jármeńkesin» ótkizýge sonaý batys óńiriniń Jańaqala aýdanynan ónerli baldyrǵandardyń arnaıy kelýi sebep boldy. Osy sharany kórýge qalanyń júzden astam turǵyny jınalǵany qýantty. Onyń ishinde baldyrǵandar da, egde jastaǵy adamdar da boldy. Rıza bolǵan jurtshylyq osyndaı taǵylymdyq máni zor mádenı sharalar elimizdiń barlyq óńirinde ótkizilip tursa, ulttyq ónerdi dáripteýdiń shynaıy úlgisi bolar edi degen tilekterin jetkizdi. Dombyra arqyly urpaq tárbıeleý isin qolǵa alýymyz kerek. Sol arqyly tól tarıhymyzdy álemge tanytamyz jáne jastardyń boıyna patrıottyq sezimdi uıalata alamyz. Bizdiń basty maqsatymyz – osy», - dedi.
Taǵy bir jaqsy úrdis oryn aldy. Dına eskertkishi aldynda qala turǵyny Nursultan Turlybekuly alty jasar uly Aısultanǵa dombyra syılap, «Osy jerde óner kórsetken aǵalaryńnyń jolyn bersin!» dep ákelik tilegin aıtty.
Mádenı sharanyń joǵary deńgeıde ótýine QR Parlamenti Senatynyń birneshe shaqyrylymynyń depýtaty bolǵan Rashıt Ahmetov pen Májilis depýtaty Amanjan Jamalov qoldaý jasady.