Din týraly zań jobasy: Balalardy qorǵaýǵa erekshe ekpin qoıylǵan

ASTANA. QazAqparat - Eń basty maqsattardyń biri balalardy destrýktıvti dinı aǵymdardan qorǵaýǵa negizdelgen. Bul týraly dinı qyzmet máselelerine arnalǵan jańa zań jobasynyń talqylaýynan keıin Májilis depýtaty Máýlen Áshimbaev málim etti, dep habarlaıdy QazAqparat.

Aıta keteıik, búgin Parlament Májilisinde «QR keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý» týraly zań jobasy tanystyryldy. Osy oraıda  qujatta  alǵash ret «destrýktıvti dinı aǵym» jáne «dinı radıkalızm» sııaqty uǵymdardyń zańdy anyqtamasy engizilip otyr.

«Jalpy, zań jobasy óte mańyzdy. Ony talqylaý barysynda ózekti máseleler kóterildi. Bir jaǵynan alyp qaraǵanda, bul túzetýler bizdiń irgeli quqyqtarymyzdy júzege asyrýǵa, ekinshi jaǵynan olar elimizdegi dinı turaqtylyqty qamtamasyz etýge qyzmet etetin bolady. Atap aıtqanda, qujattaǵy negizgi normalardyń arasynan bizdiń balalarymyzdyń quqyqtaryn qamtamasyz etetin erejelerdi kúsheıtý óte mańyzdy bolyp otyr. Destrýktıvti dinı uıymdardan balalardy qorǵaý asa ózekti maqsattardyń biri jáne zań jobasynda bul másele bólek normamen qarastyrylǵan», - dep túsindirdi Máýlen Áshimbaev.

Sonymen qatar depýtat zań jobasynda eskerilip otyrǵan jańa túzetýler arqyly endi Qazaqstanda bazalyq dinı bilim alǵandar ǵana shetelge baryp dinı oqýyn jalǵastyra alatynyn atap ótti.

«Zań jobasy kóptegen azamattardyń múddelerine qatysty bolǵandyqtan, Májiliste onymen jumys ashyq túrde júrgiziledi. Osy oraıda dinı birlestikterdiń, úkimettik emes uıymdardyń, sarapshylardyń usynystary qarastyrylatyn bolady», - dedi Máýlen Áshimbaev.