Din taqyrybynda ótken jýrnalıster baıqaýynyń jeńimpazdary belgili boldy
Almaty qalalyq qoǵamdyq damý basqarmasynyń qoldaýymen Ulttyq jýrnalıstik zertteý ortalyǵy 1 mamyr men 1 qazan aralyǵynda din salasyndaǵy ózekti máselelerge baılanysty almatylyq jýrnalıster arasynda úzdik shyǵarmalarǵa baıqaý jarııalaǵan bolatyn. Búgin sol baıqaýdyń qorytyndysy shyǵarylyp, júzden júırik shyqqandarǵa arnaıy dıplom men elektrosamokattar tartý etildi.
«Bul baıqaýdyń basty maqsaty – dinı senim bostandyǵyna baılanysty Qazaqstan Respýblıkasynyń memlekettik saıasatyn, negizgi ustanǵan ustanymyn, saıasatyn túsindirý, qoǵam nazaryn din salasyndaǵy túrli máselelerge aýdarý. Ult múddesine nuqsan keltiretin túrli dinı teris aǵymdar men ekstremıstik toptarǵa qarsy kúresti kúsheıtýge úles qosý, jat pıǵyldy toptarǵa qarsy aqparattyq kampanııany qurý. Sonymen qatar, bolashaq urpaq boıyna ulttyq dil men dástúr jóninde tálim-tárbıeni sińirý»,- dedi Almaty qalalyq Qoǵamdyq damý basqarma basshysynyń orynbasary Aıdar Esenbekov
Baıqaý sharty boıynsha, materıaldar Qazaqstannyń zaıyrly memlekettik qurylymyn qarapaıym ári uǵynyqty tilmen túsindirip, memlekettik saıasattyń zańnamalyq talaptaryn uǵyndyrýy, dinı ekstremıstik aǵymdardy áshkerelep, dástúr men dinniń ózara baılanysyn jetkizýi, dinı ekstremızmniń aldyn alý, teris dinı toptardyń ıdeologııasy men olardyń zııanyn ashyp kórsetýi tıis bolatyn.
Baıqaýǵa BAQ jýrnalısterinen ózge bloger, ǵalym, pýblıtsıster qatysty. 52 úmitkerden 120-dan astam jumys kelip tústi. Qazylar ótkir pýblıtsıstıkalyq janrlarǵa erekshe nazar aýdarǵandaryn aıtady.
Úzdik shyǵarmalar baıqaýynda aldymen yntalandyrý syılyǵy tabystalyp, oǵan «Túrkistan» gazetiniń jaýapty hatshysy Dınara Myńjasar, «Arhar» saıtynyń tilshisi Ashat Qasenǵalıev, «yyvision.kz» saıtynyń tilshisi Tólegen Bekmýhamedov, táýelsiz jýrnalıst, bloger Gúlden Jandıldınova, «Hıkmet» teleradıostýdııasynyń tilshisi Erkin Úsenbaev laıyq dep tanyldy. Syılyq ıegerleri 20 myń teńge men arnaıy dıplom aldy. Sondaı-aq, qazylardyń sheshimimen «Fotóner» qoǵamdyq birlestiginiń prezıdenti, belgili fotograf Asylhan Ábiraıymuly «Eń úzdik fotoreportaj» nomınatsııasynyń, «Qazaq radıolary» JShS Almaty stýdııasynyń redaktor-júrgizýshisi Baqytjan Jarmuhambet «Eń úzdik radıo janry» nomınatsııasynyń arnaıy júldesine ıe boldy.
Al dinı ekstremızmge qarsy kúreste qatarlastarynan úzdik shyqqan jýrnalıster men kósemsózgerler tómendegideı nomıantsııalardy jeńip aldy. «Eń úzdik televızııa janry» nomınatsııasyn «Qazaqstan» ulttyq arnasynyń «Iman ózegi» baǵdarlamasy, «Merzimdi baspasózdegi qazaq tilindegi eń úzdik pýblıtsıstıkalyq maqala» nomınatsııasyn «Nur-Múbarak» Egıpet ıslam mádenıeti ýnıversıtetiniń baspasóz hatshysy, ıslamtanýshy-jýrnalıst Aısha Keńesbaeva, «Internet jelisindegi eń úzdik beınerolık» nomınatsııasyn «Almaty» arnasynyń telejúrgizýshisi ári tilshisi Áıgerim Erdáýletqyzy, «Internet jelisindegi qazaq tilindegi eń úzdik maqala» nomınatsııasyn Qamshy.kz aqparat agenttiginiń tilshisi Berik Beısenuly, «Internet-resýrstaǵy orys tilindegi eń úzdik maqala» nomınatsııasyn Zakon.kz jelilik basylymynyń arnaıy reportajdar bóliminiń redaktory Torǵyn Nurseıtova, «Eń belsendi bloger» nomınatsııasyn Ekstremızmniń aldyn alý salasyndaǵy mamandardy qaıta daıarlaý ınstıtýtynyń dırektory, belgili ıslamtanshy-teolog Asqar Sabdın, «Merzimdi baspasózdegi orys tilindegi eń úzdik pýblıtsıstıkalyq maqala» nomınatsııasyn dintanýshy, ál-Farabı atyndaǵy QazUÝ dintaný jáne mádenıettaný kafedrasynyń aǵa oqytýshysy Elnar Berikbaev, «Áleýmettik jelidegi eń belsendi qoǵamdyq top» nomınatsııasyn Instagram, Facebook, «VKontakte» áleýmettik jelilerindegi «Biz ekstremızmge qarsymyz» paraqshasy ıelendi.
Uıymdastyrýshylar jýrnalısterge qoldaý kórsetý sharalary budan keıin de jalǵasyn tabatynyn jetkizdi.
Esterińizge sala keteıik, dinı ekstremızmniń aldyn alý maqsatyndaǵy bul baıqaý Ulttyq jýrnalıstik zertteý ortalyǵynyń muryndyq bolýymen Almatyda osymen tórtinshi ret ótkizilip otyr.