Din salasyndaǵy ózekti máseleler talqylanatyn jańa dıalog alańy ashyldy

NUR-SULTAN. QazAqparat – QR Aqparat jáne qoǵamdyq damýmınıstrligi Din isteri komıteti din salasynda bilim alyp júrgen jastarmen jáne jas mamandarmen ózekti máselelerdi talqylaýǵa arnalǵan «YZ CLUB» dıalog alańyn ashty.

Bul týraly QR Aqparat jáne qoǵamdyq damý mınıstrligi Din isteri komıtetiniń tóraǵasy Erjan Núkejanov aıtyp berdi, dep habarlaıdy QazAqparat tilshisi.

«Osyǵan deıin aıtylyp kelgen din salasyndaǵy maman tapshylyǵy máselesi qazir sheshimin taýyp keledi deýge bolady. Jyl saıyn dintaný ıslamtaný, teologııa mamandyqtary boıynsha 500-ge jýyq maman daıyndalady. Jas mamandarmen turaqty baılanys ornatý maqsatynda «YZ CLUB» dıalog alańyn ashtyq. Bul platforma jastarmen din salasyndaǵy ózekti máselelerdi talqylap, jańashyl bastamalardy júzege asyrýǵa óz yqpalyn tıgizedi dep oılaımyz», -dedi E. Núkejanov Ortalyq kommýnıkatsııalar qyzmetinde ótken baspasóz máslıhatynda.

Budan basqa, komıtet halyqpen turaqty keri baılanys ornatý maqsatynda «Halyqqa qyzmet – mańyzdy mindet» jobasyn bastady.

«Bul jobada komıtet Instagram, Facebook áleýmettik jelilerinde tikeleı efırge shyǵyp, atqarylǵan jumystar týraly baıandap, halyqty tolǵandyryp júrgen suraqtarǵa jaýap beredi. Jalpy qazir elimizdegi dinı ahýal turaqty. Belgili bir máseleler týyndap otyrady, ony jumys barysynda sheship otyramyz. Eń bastysy – aqparattyq salaǵa kóńil bólý kerek. Aqparatty alǵanda da talǵammen, sanaly túrde qaraǵan durys», - deıdi komıtet tóraǵasy.

Aıta keteıik, bıyl birinshi jartyjyldyqta 84 myńnan astam adam áleýmettik jelidegi radıkaldy toptardan shyǵaryldy. Dinı ekstremızm men terrorızm ıdeıalaryn nasıhattaıtyn 80 myńnan astam materıal joıylyp, 300-den astamy buǵattalǵan.