Din salasynda tujyrymdama ázirleý memlekettiń dinnen bóliný qaǵıdatyna qaıshy kelmeıdi - Ermekbaev

ASTANA. QazAqparat - Din salasyndaǵy tujyrymdamany ázirleý memlekettiń dinnen bóliný qaǵıdatyna qaıshy kelmeıdi. Bul týraly Ortalyq kommýnıkatsııalar qyzmetindegi brıfıngte elimizdiń Din isteri jáne azamattyq qoǵam mınıstri Nurlan Ermekbaev málim etti, dep habarlaıdy QazAqparat.

«Din salasyndaǵy eń mańyzdy mindet - elimizdiń damýynyń zaıyrly qaǵıdatyn qamtamasyz etý jáne nyǵaıtý. ıAǵnı, azamattardyń ar-ojdan bostandyǵyn buljytpaı kepildendirý, onyń dindi tańdaı alý nemese dinnen bas tarta alý quqyǵyn qamtamasyz etý - bizdiń zaıyrlyq modelimizdiń aınymas negizi retinde qala beredi. Osy turǵydan alǵanda, qoǵamymyzda berik ornyqqan konfessııaaralyq kelisimdi odan ary nyǵaıtý dinı birlestiktermen birlesken jumysymyzdyń asa mańyzdy baǵyty bolyp qala beredi», - dedi ol.

Mınıstr osy rette elimizde din salasyn damytý týraly tutastaı túsinik qalyptastyrý úshin din salasyndaǵy memlekettik saıasat týraly tujyrymda ázirleý kózdelip otyrǵandyǵyn aıtty. Bul qujatta memlekettiń din salasyndaǵy ustanymy, strategııalyq maqsattary jáne jumys baǵyttary aıqyndaıtyn bolady. Qujatty ázirleýge sarapshylar, dintanýshylar, azamattyq qoǵam ókilderi tartylyp, ony qoǵamnyń qatysýymen ashyq túrde talqylaý josparlanǵan.

«Tujyrymdama negizinde dinı qyzmet týraly zańnamaǵa engiziletin ózgerister men  tolyqtyrýlardy daıyndaıtyn bolamyz.  Uıymdastyrýshylyq  jáne zańnamalyq sharalar memleket pen qoǵamnyń zaıyrlylyǵyn odan ary nyǵaıtýǵa baǵyttalady. Bul dinı bilim alý tártibin retteýdi, jasóspirimderdi dinı qyzmetke zańsyz tartýǵa jol bermeýdi, dinı ádebıetterdi taratý tártibin jetildirýdi qajet etedi. Biz dindar adamdarǵa dinı rásimderin óteý úshin qolaıly jaǵdaılar jasaıtyn bolamyz», - dedi ol.

Sonymen qatar Ermekbaev ózinen din salasyndaǵy tujyrymdama ázirleý memlekettiń dinnen bóliný qaǵıdatyna qaıshy kelmeı me dep suraıtyndardyń kóp ekendigin aıtyp, oǵan naqty jaýap ta berdi.

«Menińshe, munda qandaı da bir qaıshylyq joq. Óıtkeni búgingi kúnde dinı birlestikter qoǵamdyq ómirdegi shynaıylyq, azamattyq qoǵamnyń bir bóligi. Al memleket olardyń qyzmet atqarýy úshin quqyqtyq jaǵdaılar men orta qalyptastyrýda. Osy turǵydan alǵanda, tujyrymdama - bul memleket pen dinı birlestikter arasyndaǵy qatynastarǵa kózqarastar júıesi, zaıyrlylyq qaǵıdatynyń tuǵyry der edim», - dedi mınıstr.