Din mınıstri destrýktıvti dinı ıdeologııaǵa qarsy joldy qalyptastyrýǵa shaqyrdy
Forým jumysyna ortalyq memlekettik organdardyń basshylary jáne ókilderi, QR Parlamenti Májilisiniń depýtattary, dintanýshy-ǵalymdar, eldegi joǵary oqý oryndaryndaǵy dintaný kafedralarynyń tájirıbeli oqytýshylary, ǵylymı qyzmetkerler men dinı birlestikter jáne ÚEU-lardyń ókilderi qatysty. Sharanyń plenarlyq otyrysynda QR Din isteri jáne azamattyq qoǵam mınıstri Nurlan Ermekbaev zamanaýı kezeńdegi din salasyndaǵy memlekettik saıasatty júzege asyrýdyń negizgi baǵyttaryna toqtaldy.
«Qoǵamda kez kelgen destrýktıvti dinı ıdeologııany múldem qabyldamaýdy qalyptastyrýymyz kerek. Bul jerde birlik pen jalpy ujymdyq kúsh-jiger mańyzdy. Elbasy men memlekettik saıasatty qoldaý tek qana sózben emes, kúndelikti minez-qulyqta, is-árekette, tipti syrtqy beınesinde kórinetinin ár azamat óz jaqyndaryna,tanystaryna túsindirýi qajet», - dep atap ótti N.Ermekbaev.
Mınıstrdiń aıtýynsha, jekelegen azamattar memleket ustanymyna qoldaý bildire tura, normatıvtik quqyqtyq aktilerdi buzady.
«Zań talaptaryna qaramastan ózderiniń dinı birlestikterin tirkeýden, dinı ýájderimen ekpe egýden, qan quıýdan bas tartady. Internetten sheteldiń radıkaldy din ýaǵyzdaýshylarynyń dáristerin júktep taratady. Elbasymyzdyń Qazaqstan halqyna jáne salt-dástúrlerine jat syrtqy kórinisterge jol bermeý týraly aıtqandaryna qaramastan, basqa elderge tán qara kıim kııý, jaǵymsyz, murtsyz saqal qoıý, qysqa shalbar kııýdi jalǵastyrýda», - dedi Nurlan Ermekbaev.
Eske sala keteıik, Astana qalasynda «Qoǵamdyq sanany jańǵyrtýda din salasyndaǵy memleket saıasatynyń róli» atty Qazaqstan dintanýshylarynyń VII forýmy ótýde. Uıymdastyrýshylardyń aıtýynsha, atalǵan forýmnyń maqsaty - din salasyndaǵy memlekettik saıasatty júzege asyrý úshin ǵylymı jáne sarapshylar qaýymdastyǵyn jáne ÚEU-lardyń ókilderin birlesip jumys isteýge shaqyrý.