Din isteri mınıstrligi: Sırııaǵa ketkenderdiń 90 paıyzy keıinnen ókinip qalady
Atalǵan mınıstrlik baspasóz qyzmetiniń málimetine qaraǵanda, N. Ermekbaev Sırııaǵa ketken adamdar týraly másele vedomstvo quzyretine kirmeıtinin túsindirdi. Sebebi atalǵan elge ártúrli adamdar barady, negizinen olardyń saparlary dinı kózqarastaryna baılanysty emes.
«Bul adamdar ıslamnyń qundylyqtaryn, senim postýlattaryn durys túsinbeıdi. Bizdiń elde kez kelgen konfessııalar men dinı senimderge jaǵdaılar jasalǵan. Eshkim de qyspaqqa alynǵan emes. Dindarlardyń quqyqtary qamtamasyz etilgen. Tıisti dinı ǵımarattar turǵyzylǵan, sondaı-aq eldiń zańnamasyna qaıshy kelmese, búldirgish áleýetti qamtymasa, olar ózderiniń ádebıetterin emin-erkin oqı alady. Al atalǵan elge ketetinder nanym-senimniń túsinigin burmalaıdy. Olar óz kezeginde zańdy buzýshylar bolady», - dedi mınıstr azamattardyń saýalyna jaýap berý kezinde.
Ermekbaevtyń sózine qaraǵanda, bizdiń zańnamada shetelge baryp, lańkestik jáne basqa da zańǵa qaıshy is-qımyldarǵa qatysqan adamdardy sot sheshimimen qazaqstandyq azamattyqtan aıyrý múmkindigin qamtıtyn norma qarastyrylǵan.
«Sol kezde osy adamdarǵa keri qaıtatyn jol jabyq bolady. Sondyqtan da kez kelgen adam lańkestik uıymdardyń sapyna kirerden buryn, aldymen ózin jáne otbasy múshelerin Otansyz jáne azamattyqsyz qaldyrýy múmkin ekendigin oılaýy tıis. Atap aıtqanda, Sırııaǵa ketkenderdiń 90 paıyzy keıinnen ókinip qalady. Olardyń ishinde keıbiri ómiri qıylǵandyqtan orala almaıdy, al qalǵandary jazadan qorqyp, elge kelmeıdi. Bul negizi adam tragedııasy. Osynyń barlyǵy ınternette nemese tanystar arqyly júrgiziletin teris nasıhattyń saldary. Qandaı da bir halıfatta ómir súrýdi armandaıdy, alaıda ol shyn mánin joq. Onda kádimgi qylmystyq toptar bar, sáıkesinshe sol jerde zorlyq-zombylyq pen urlyq, sondaı-aq ózge de qylmystyq jaǵdaılar oryn alýda», - dedi vedomstvo basshysy.