Din isteri mınıstri jastarǵa kıeli jerlerdi aralatyp shyqpaq
Onyń aıtýynsha, Memleket basshysy Nursultan Nazarbaevtyń "Bolashaqqa baǵdar: rýxanı jańǵyrý" maqalasynda kórsetilgen máseleler jastarmen tyǵyz jumys jasaýdy mindettep otyr. "Birinshiden, maqalanyń "Týǵan jer" taraýy kıeli oryndardyń tarıxı jáne rýxanı mańyzdylyǵyn uǵynýǵa ıtermeleıdi. Osyǵan oraı, biz ishki jastar týrızmin damytý boıynsha arnaıy grant bólýdi josparlap otyrmyz. Ondaı bastama týrızm men demalys nysandaryn damytýǵa, osy jumysqa bıznesti tartýǵa, mádenı týrızmdi, ólketanýdy nasıxattaýǵa baǵyttalatyn bolady", - dedi Ermekbaev mınıstrliktiń búgingi alqa májilisinde.
Mınıstrdiń sózine qaraǵanda, qoǵamnyń sanasyn jańǵyrtý sııaqty aýqymdy sharany iske asyrýda úkimettik emes uıymdardyń róli zor. Búginde osy sanattaǵy uıymdarǵa granttardy bólý erejesi qaıta qaralyp jatyr. Sonyń aıasynda granttardy alý jumysyn ashyq ári jeńil etý kózdelgen. "Osy baǵyttaǵy áriptestik baılanystaryn nyǵaıtý maqsatynda úshjaqty yntymaqtastyqqa arnalǵan "Asar" forýmyn ótkizý josparlanyp otyr. Sol jerde úkimettik emes uıymdar óz jobalaryn tanystyra alady. Sondaı-aq úkimettik emes uıymdardyń bıznespen áriptestik ornatý jaıy qaralady. Sondyqtan biz bıznesti qyzyqtyratyn jobalar men ıdeıalardy asyǵa kútemiz", - dep atap kórsetti mınıstr.
Aıta keteıik, májilis kezinde mınıstr memleket pen din arasyndaǵy baılanystyń jańa modelin qalyptastyrý sharalarynyń qolǵa alynǵanyn jetkizdi. Atalǵan model din salasyndaǵy memlekettik saıasatynyń 2017-2020 jyldarǵa arnalǵan tujyrymdamasyna negizdeledi.
Budan bólek, dinı qyzmet jáne dinı birlestikterge arnalǵan zańnamaǵa ózgerister engizip, balalardy zańsyz dinı qyzmetke tarqany úshin jazany kúsheıtý kózdelgen.
Al ımamdar men teologtar ekstremızmge qarsy arnaıy daıyndyqtaryn jalǵastyra beretin bolady.