Din beriktigi – el tynyshtyǵy

ALMATY. QazAqparat - Búgingi tańda elimizde dinı turaqtylyq qalyptasyp, halyqtyń basym bóligi dástúrli hanafı mazhabyn ustanyp, salt-dástúrin saqtap keledi. Degenmen de, álemde radıkaldy sektalardyń beleń alyp, dinı ekstremızm, terrorızm máseleleri birqatar elderde órship, qalyń buqara zardap shegýde. Aram oıly, teris pıǵyldy radıkal toptardyń ókilderi bizde de júr.

Eń ókinishtisi, terrorızmdi ıslam dinimen baılanystyratyn radıkaldy sektalardyń teris áreketteri oryn alýda. Elimizdegi jat aǵymnyń jeteginde ketip, adasyp júrgen baýyrlardy túzý jolǵa salý - barshanyń mindeti. Sebebi olar birimizge týys, aǵa-ápke bolsa, endi birimizge jekjat bolyp keledi. Sondyqtan, rýhanı dúnıetanymymyzdy baıytyp, dástúrdi ulyqtaıtyn sharalardy kóptep ótkizý qajet.

Qazir Qazaqstannyń barlyq aımaǵynda aqparattyq top din salasyndaǵy ózekti máselelerdi qozǵap, ekstremızm men terrorızmniń aldyn alý boıynsha turǵyndarmen, jastar, memlekettik jáne bıýdjettik sala qyzmetkerlerimen tıisti jumysty atqaryp keledi.

Basty maqsat – tarıhı tamyrymyzǵa zer salyp, dinge baılanysty dúnıeni tereń zerdelep baǵamdaı bilý. Islam dini - ultymyzdyń basty rýhanı negizi, ata-baba ustanǵan, qaster tutqan sara jol ekenin qoǵamǵa nasıhattap, tarıhymyz ben eldik sanamyzdy saralap, urpaqqa baǵyt-baǵdar berý qajet. Alaıda, dinniń atyn jamylyp, jastar arasynda teris baǵyttaǵy aram oıyn júzege asyratyndar da bar. Ásirese, áleýmettik jelilerdegi terrorızm men ekstremızmge, qatygezdik pen ultaralyq janjalǵa shaqyratyn toptardan aýlaq bolǵan abzal. Ata-analar da balalaryna únemi baqylaý jasap otyrýy kerek dep oılaımyn.

Elimizde 3-4 jyldan beri dinı ekstremızm, terrorızm máselelerinen japa shekkenderge kásibı zańger, teolog, dintanýshy jáne psıholog mamandar qyzmet kórsetip keledi. Kez kelgen ata-ana ul-qyzynyń kúmándi saıttarǵa kirip júrgenin ne dinı ustanymynyń ózgergenin baıqasa, osy mamandarǵa júginýi tıis.

Elde qalyptasqan ulttyq dástúr men ustanym Islam dinimen bite qaınasyp jatyr. Sondyqtan, dinı saýatsyzdyq qashanda jat qylyqtarǵa jol berip, halyq arasynda dúrbeleń týǵyzady. Bóten aǵymdardyń etek jaıýyna múmkindik bermeı, elge janashyrlyq tanytyp, jas urpaqtyń zamanǵa saı ozyq bilim alýyna, musylmandyq tálim-tárbıemen sýsyndaýyna árbir azamat jaýapty ekenin umytpaıyq.

Ahmet Jumabekuly

ımam