Dımashtyń Qytaıdaǵy kontsertine bıletter 84 myń teńgege deıin satylýda
Qytaılyq Weibo áleýmettik jelisindegi aqparattarǵa sensek, Dımash Qudaıbergen aldaǵy kúnderi Qytaıdyń birqatar qalasynda án keshin ótkizedi. Ánshi alǵashqy kontsertin 16 jeltoqsan kúni «Singer - 2017» baıqaýy ótken Hýnan provıntsııasynyń Chansha qalasynda ótkizýdi josparlap otyr. Al ekinshi kontserti 2018 jylǵy 6 qańtar kúni Fýtszıan provıntsııasynyń bas qalasy Fýchjoýda ótpek.
Aıta keteıik, otandasymyzdyń talantyna tánti qytaılyq jankúıerler kontsert bıletterin qazirdiń ózinde ınternet arqyly satyp alyp jatyr. Bıletterdiń baǵasy 14 myń teńgeden (280 ıýan) bastalyp, 84 myń teńgege (1680 ıýan) deıin jetedi.
Eske sala keteıik, Dımash aǵymdaǵy jyldyń basynda Hunan TV «Singer - 2017» án baıqaýyna qatysyp, ekinshi oryn ıelengen bolatyn. Sondaı-aq básekedegi otandasymyzdyń erekshe talanty qytaılyq jáne basqa da elderdiń ánsúıer qaýymyn ózine qaratty.