Dımashtyń koronavırýspen kúreske arnalǵan áni altyn sertıfıkatqa ıe boldy

NUR-SULTAN. QazAqparat – Dúnıejúzine tanymal qazaqstandyq ánshi Dımash Qudaıbergenniń koronavırýspen kúreske arnalǵan áni Qytaıdyń mýzykalyq platformasynda altyn sertıfıkatqa ıe boldy, dep habarlaıdy QazAqparat tilshisi.

«Dımash Qudaıbergenniń «We Are One» áni Qytaıdyń QQ Music platformasynda altyn sertıfıkatty ıelendi. Jankúıerleriniń qoldaýynyń arqasynda sıngl 1 mln tanymaldylyq ındeksin jınady», - delingen Instagram-daǵy dimash.news paraqshasynda.

Dımash koronavırýs pandemııasyna qarsy kúreske án arnaǵany buǵan deıin habarlanǵan edi. «We Are One» (Biz birgemiz) atty jańa ánine túsirilgen beınebaıan VKontakte áleýmettik jelisindegi «Sınhýa jańalyqtary| Xinhua News» paraqshasynda jarııalandy. Beınebaıanda vırýstyń alǵashqy oshaǵy – Ýhan qalasy – dárigerler, volonterler, maska taqqan adamdar, gýmanıtarlyq kómektiń qabyldanýy, dúkenniń bos qalǵan sóreleri kórsetilgen.

Vıdeo sońynda aspandaǵy bult seıilip, dárigerlerdiń qýanyshy, maskalaryn sheship tastaǵan balalardyń máz-meıram kezi kórsetilgen.