Dımashtyń kontsertine uzyn-sonar kezek paıda boldy

NUR-SULTAN. QazAqparat -Búgin «Astana Arena» stadıonynda ótetin Dımashtyń jeke kontsertine halyq aǵylyp kelip jatyr, dep habarlaıdy QazAqparat tilshisi.

Saǵat keshki 22:00-de bastalatyn kontsertke kórermenderdi saǵat 19:00-den bastap kirgize bastady. «Astana Arenanyń 6 kireberisinde halyq ishke ený úshin uzyn-sonar kezekke turýda.

Uıymdastyrýshylardyń aıtýynsha, kontsertke 350 erikti jumyldyryldy.

Sondaı-aq, negizgi zaldan bólek 10 myń adamdy qamtıtyn jankúıerler alańy qarastyrylǵan. Al jalpy stadıon 30 myń adamǵa arnalǵan.

Eske salsaq, buǵan deıin D. Qudaıbergenniń «Arnaý» atty jeke kontserti 29 maýsym kúni elordada ótetini týraly habarlaǵan bolatynbyz. Al telekórermender úshin 6 shilde kúni «Astana kúni» merekesine oraı «Qazaqstan» ulttyq arnasynan kórsetiledi.

Kontsert uıymdastyrýshylarynyń aıtýynsha, kesh bıletterin álemniń 64 elinen 10 myńǵa jýyq tyńdarman satyp alǵan. Onyń ishinde AQSh, Ulybrıtanııa, Brazılııa, Meksıka, Kanada, Avstralııa, Shveıtsarııa, Malaızııa, Sıngapýr, Afrıka, Egıpet, Izraıl jáne Marokko syndy alys memleketterdiń tyńdarmandary bar.

Sondaı-aq, Dımash Qudaıbergenniń kontsertine baılanysty elordada joldar jabylady.