Dımashtyń kontserti: Qazaqstan týraly qytaılyqtar qandaı pikir aıtty
Bul keshke Qazaqstan men alys jáne jaqyn shetelderden 30 myń ánsúıer qaýym jınaldy. Basqa eldiń jankúıerleriniń ishinde qytaılyqtar men reseılikterdiń sany basym bolǵany da belgili. Al kontserttiń uıymdastyrylý deńgeıine ár túrli pikirler aıtylsa da, sheteldik týrısterdiń Dımashtyń ónerine, Qazaqstan, Astana jáne EKSPO kórmesine degen yqylasy erekshe.
Tómende «QazAqparat» HAA Dımashtyń kontsertine arnaıy kelgen qytaılyq týrısterdiń Qazaqstan jaıly pikirlerin usynady.
Dımash kelisim shartqa otyrǵan BGTalent (黑金经纪) prodıýserlik ortalyǵynyń negizin qalaýshy ári bas dırektory Nıe Sınıýan (聂心远) «Bastaý» kontsertine arnaıy keldi. Nıe myrza óziniń Weibo paraqshasynda «Kórkem Astana, kelesi kezdeskenshe», «Esten ketpes kúnder, qonaqjaı halyq» jáne «Kelesi kezdeskenshe, perishte daýysty Dımash, óte keremet kesh», - degen pikirlermen fotolar jarııalady.
Qytaıdyń juldyzy, Dımashtyń «Singer 2017» baıqaýyndaǵy basty qarsylasy jáne «Bastaý» án keshiniń qurmetti qonaǵy Lın Chjısıýan (Terry Lin): «Keshe Dımash óte jaqsy óner kórsetti. Men oǵan qarap otyryp, ony shyn júregimmen maqtan tuttym», - dep jazdy óziniń Weibo paraqshasyna.
Al kontsertti tamashalaý úshin arnaıy Qytaıdan kelgen jankúıer buǵan deıin Qazaqstan týraly bilmeıtindigin jáne bul kúnde Qazaqstan men Dımash qytaılar úshin bir uǵym bolyp ketkenin aıtty. Sonymen qatar, Astana jáne Almaty qalasynyń, Býrabaı jáne Sharyn shatqalynyń ásem tabıǵaty qytaılyqtarǵa erekshe áser qaldyrǵan.
«Biz Dımash Qubaıbergendi erekshe qurmetteımiz. Onyń júrgen jerin kórý úshin Qazaqstandaǵy kontsertine arnaıy keldik. Maǵan Astana erekshe unady. Bunda Beıjiń qalasymen salystyrǵanda ashyq aspan, taza aýa. Azyq-túlik sapasy jáne ulttyq taǵamdardyń dámi erekshe. Kontsert óte joǵary deńgeıde ótti. Dımashtyń 2 saǵat demalmaı án aıtqanyna ishteı júregim aýyrdy, ol qatty sharshaǵan shyǵar dep oılaımyn. Búgin Almatydan Qytaıǵa qaıtamyz. Qonaq úıdiń qyzmet kórsetý sapasy óte joǵary deńgeıde, ortasy jáne tábıǵaty tamasha jerge ornalasqan. Bul saıahatym men úshin erekshe boldy», - deıdi ánshiniń fanaty Tan Mılıń.
Sondaı-aq, keı qytaılyq qonaqtar qazaqstanda uıaly baılanys jelisiniń nashar ekenine shaǵymdandy.
«4G ınterneti dep kórsetip tur, áıtsede 3G jyldamdyǵynda jumys isteıdi. Astanadan Almatyǵa barar jolda tipti 2G ınternette, baılanysta shyqpaı qaldy», - dep jazdy In ıÝchen atty jankúıer weibo paraqshasynda.
Aıta keteıik, buǵan deıin qazaqstanda áleýmettik jelilerde «Bastaý» kontsertiniń uıymdastyrylý deńgeıiniń Dımashqa saı emes ekendigi, ánshige shetelge baryp ózin damytý kerek ekendigi jaıly pikirler aıtylǵan bolatyn.