Dımashtyń Frantsııadaǵy fanattary ánshimen kezdesýdi armandaıdy - elshilik ókili

AQTÓBE. QazAqparat - Dımash Qudaıbergen kóktemde Frantsııada ótetin halyqaralyq frankofonııa merekesine barýy múmkin. Qazaqstandaǵy Frantsııa elshiligi, mádenıet jáne yntymaqtastyq jónindegi keńesshisi Gııom Kasperskı Dımashty frantsýz fanattary kútetinin jetkizdi, dep habarlaıdy QazAqparat tilshisi. 

«Dımash Qudaıbergendi tanımyz. Ol frantsýz tilinde án aıtady ári onyń Aqtóbe qalasynan ekenin bildik. Qazaqstandaǵy Frantsııa elshiligi Dımashpen birge jumys isteıdi. Dımash- Qazaqstan maqtanyshy. Ony Frantsııada da tanıdy, jaqsy kóredi. Tipti Frantsııada Dımashtyń fanattar klýby bar. Fanattary Dımashpen kezdesýdi armandaıdy. Jospar boıynsha kóktemde Halyqaralyq frankofonııa merekesin qoldaýshy retinde qatysýy múmkin. Án shyrqaýy da yqtımal. Ol frantsýz tilinde án shyrqaýdyń mańyzdylyǵy men frantsýz áni oǵan ne bergenin aıtady dep senemiz. Sol kezde Aqtóbe qalasy týraly da aqparat berýi múmkin. Sebebi, Aqtóbe týraly Frantsııa az biledi. Eki el arasyndaǵy mádenı baılanys dostyǵymyzdy nyǵaıta túseri sózsiz»,- dedi Qazaqstandaǵy Frantsııa elshiligi, mádenıet jáne yntymaqtastyq jónindegi keńesshisi Gııom Kasperskı.

Aıta keteıik, Aqtóbege frantsýz mýzykanttary kelip, Jubanovtar álemi ortalyǵynda óner kórsetti. Mýzykanttar Ǵazıza Jubanovanyń shyǵarmasyn oryndady.